Rohinya Mibu Thahnak Kongah US Le UN Nih Cithlat Tuah Dingin Kawl Cozah An Hal

TCP-Online| 2018 February 10| Vawleicung thawngzamhca minthang simi Reuters News nih Kawlram chung Rakhine ramkulh ah Rohinya minung a bu in thahnak a um kong a tial tikah US le UN nih Kawl cozah sinah cithlatnak tuah ding in an hal colh hna.

Hi kongah US ramleng Minister zung in Justin Higgins nih “Rakhine ramkulh Indin khua ah minung a bubu in an thahmi ruak le Rakhine ramkulh hmun dangdang a cangmi kong kan theih tikah kan thin a phang i kan lung zong aa nuam lo ngai. Mah hihi nuhrin covo buar ngaingai a si. Hiti a cangmi kong kongah Kawl cozah lei zong nih biatak tein cithlat an tuah ve a hau i US zong nih cithlat tuah kan duhmi hi a kan cohlan piak a herh.”

 

UN ah US palai simi Nikki Haley zong nih February 9 ni khan, Kawlram chung ah a cangmi kong hi biatakte in cithlat a herhnak kong le Reuters Reporter minung pahnih an tlaihmi zong a rannak in an chuah naklai a chim ve.

UN Secretary General Personal Assistant simi Farhan Haq nih “Kawlram ah a cang cuahmah mi a bubu minung ithahnak hi Kawl cozah nih biatakte in tuanvo a lak a herh i Reuters Reporter minung pahnih an tlaihmi hna zong a rannak in chuah a herh” tiah February 9 ni UN Assembly ah a chim.

Reuters News nih cun February 8 ni khan Rakhine ramkulh chung ah Rohinya minung a bubu in thahnak kong a tial i, hiti an tial hnu a thaizing February 9 ni UN Assembly ah hi kong cu biatakte in ruahnak/ceihhmainak an ngeih hna.

Ref;VOA

Na ruahning rak langhter ve.. (Leave a comment)

%d bloggers like this: