Ruavan Khua Pawng SKAT Motor Lehnak In Mi Pakhat A Thi I Pahnih Sii-inn An Phan
Salai Elvis| 2019 May 3| May 2 zanlei suimilam 2:20 tluk ah Hakha in Kangaw lei kalnak meng 30/falong 1-2 kar, Tinam khuakomh (Oh-suh) Ruavan khua pawng te ah SKAT motor aa leh caah minung pakhat a nunnak a liam i pahnih hliamhma an pu tiah kan theih.
Thil sining cu; Kangaw in Hakha an rak kai lei Tum Maung Thang a khalhmi SKAT motor cu Thetse an phur. An i lehnak hmun an phak in Break a pauh caah a tubantuk in lam thlang lei pe 320 a sannak zawn ah an tlak hi a si.
Mah motor cung ah motor khaltu he minung pathum an si, hi chungah motor zultu a si mi Pu Zung Mang cu a paw, a cal le a kehlei ban hliamhma he a thi i motor khaltu Tum Maung Thang le motor zultu pakhat Pu Al Ling Sang cu hliamhma an pu i Hakha sii-inn ah an thlopbul lio hna a si.
An i lehnak hmun ah tuanvo ngeitu Hakha palek, motor PK le Tinam khuabawi tel in zohfelnak an tuah tik hna ah motor khalh ning a daithlang tiin motor khaltu Tum Maung Thang cu Ya-za-tat-kyi upadi pohmah- 279/338/304 (a) ning tazacuai in dantat a si lai tiah kan theih.
Ref:Hakha iprd
About The Author
