May 21, 2024

Russia Ram Kum 20 Tluk A Uk Cangtu President Putin Thimnak Ah Teinak A Hmu Than

0

City Hunter| 2018 March 19| Kum 20 tluk Russia ram a uk cangtu Putin nih President thimnak 76.60% in avoi 4nak Russia President a tling than.

Russia rampi President thimnak ah President aa zuamcawhtu hna cu; Independent party in President Vladimir Putin, Communist party in Pavel Grudinin, LDPR in Vladimir Zhirinovsky an si. Zhirinovsky nih mee 5.73%, Pavel Grudinin nih mee 11.87% le President Putin nih mee 76.60% in an hmuh. Putin nih fak tuk in a tei hna.

Cu ruang ah Russia ram cu kum 6 chung keimah nih ka ukhruai rih lai. President thimnak i teinak ka hmuh thanmi hi ka policy pawl kha mizapi nih cohlannak an ngeihmi an langhter a si. Mizapi nih ka cung i zumhnak le ruahchannak an ngeih rihmi kha thimnak phichuak nih a langhter. Cu pin ah Russia nih atu thawk in hmailei karhlan rih ding a biapi tuk i mibu lungput he riantuan a herh tiah Moscow khuapi mizapi he tonbiaruahnak ah a chim.

Kum 65 a si cangmi Russia KGB mingaithlaitu hlun President Putin cu Russia ramkhel lamthluan a khuhchilhnak kum 18 a tling cang.

Thimnak tuah hlan ah amah a zuamcawhtu dohkalhtu hruaitu pakhat cu chawva ningcanglo hmannak in zuamnak nawl a hnonpiak. Cu pin ah minthang a simi dohkalhtu hruaitu pakhat zong 2015 kum ah khan thah a rak tong bal. President Putin a zuamcawh khotu paoh lam pakhatkhat hmang in tang ah a thumh i a thawldawi lengmang hna.

Cu ruang ah atu thimnak hi a dikfelmi thimnak a si lo tiah Putin a rak zuamcawh i thah a tongmi a fanu nih a soisel.
Cu pin ah atu thimnak hi do a tlami zuamnak le thimnak a si lo. Amah a zuamcawh kho dingmi hruaitu zuamnak nawl a phih i President aa cuhtu dang pawl zong phundangdang in lam phihnak le harnak a pek hna. Cu ruang ah a dikfelmi thimnak a si hrimhrim lo an ti.

Puti Konglam Tawi

President Putin cu Russia ramkhel riantuantu pakhat a si i 1952 kum October 7, Leningrad khua ah a chuak. Putin cu 2000 kum January in 2008 May thla tiang Russia President a tuan. 2008-2012 tiang, cun 2012 in nihin tiang Russia President a tuan. President a si hlan ah Prime Minister rian zong a rak tuan bal. Putin cu KGB ah mi ngiathlaitu rian a rak tuan bal i hlan deuh ahcun sihne (judge) pakhat zong a si. Putin cu Russia ram Orthodox khrihfabu chungtel a si. Lyudmila Putin he an i thi-um i fanu pahnih an ngei.

1985-1990 tiang KGB ah Putin cu nichuah Germany ram ah tuanvo pek a si. Nichuah Germany cozah a tlak hnu ah Putin cu Soviet United ah an auh i Leningrad ah a ra than. 1990 kum June thla ah Leningrad State University i ramkip pehtlaihnak zung ah rian a tuan. 1991 June thla ah Saint Petersburg khua zung ramkip committee ah hruaitu rian tuanvo pek a rak si. A rian biapi bik cu ramkip he i pehtlaihnak thanchoter le ramkip chawva phumnak a karh khawhnak ding hi a si. Putin cu Russia rammi le Russian miphun a si.
Ref: BBC Burmese/ Wikipedia.com

About The Author

Na ruahning rak langhter ve.. (Leave a comment)

%d bloggers like this: