June 21, 2024

SAC Kuttang BGF Chungtel Cheukhat KNDF Sin Ah An I Fonh Ko Tiah SAC Nih A Chim

0

The Chinland Post | 2023 June 30 — Kahdoh a fahnak Kayah ram chung, Thai-Myanmar ramri Mese khuachung ah a um mi SAC kuttang BGF chungtel cheukhat pawl KNDF sin ah an i fonh ko tiah SAC thawngzamh nih June 29 ah a thanh.

Mese khuachung ah a um mi SAC Taunghla sakhaan, Metanwe sakhaan, BP 14 sakhaan, Mese sakhaan le Nanpaungsan sakhaan hna cu KA, KNDF phufonh nih June 13-19 tiang an rak kah hna.

June 16 ah Panting hmunhma ah a um mi SAC kuttang No. 1004 BGF sakhaan he pehtlaihnak kan ngei kho ti lo i cuka ah riankhinh a si mi BGF chungtel pawl zong KNPP, KNDF phu pawl sin ah an i fonh tiah SAC lei nih an thanh.

Cu sakhaan pawl cu SAC nih vanlei le vawlei lei bawm in an lak khawh ṭhan bantuk in innchung ah rak hren mi ralkap chungkhar pawl zong kan khamh khawh hna tiah SAC lei nih cun an chim.

Swatpaing hmunhma ah a um mi No. 1005 BGF sakhaan zong June 27 ah SAC nih an lak khawh ṭhan nain sakhaan a hngak mi cheukhat an tlau tiah an thanh.

Mese kahdohnak ruang ah khuami 7,000 hrawng Thai ram chung le aa naihniamnak hmunhma pawl ah an zaam hna i Thai ram chung ah aa dor mi 4,000 hrawng an um tiah Karenni nuhrin covo phu nih an langhter.

About The Author

Na ruahning rak langhter ve.. (Leave a comment)