SAC Kuttang Ramri Hngak Palek 14 Bangladesh Ram Ah An Zaam
The Chinland Post | February 5, 2024 — Myanmar- Bangladesh ramri hngak SAC kuttang um palek 14 cu February 4 ni hriamnan he Bangladesh ram ah an zaam tiah theih a si.
Arakan ralkap AA he kahdohnak a um caah atu ramri lei ah an tlik/zaam hi a si.
SAC kuttang um palek le AA kahdohnak ah ramri hngak palek hi November thla 2023 kum in a tli/zaam mi an um pah cang.
India he ramri aa tlai mi Chin ramkulh ah 2023 November in 2024 January 2 tiang a cang mi kahdohnak voi 5 chung in ralkap an zaam hi a si i Assam Rifle nih an cohlan hna hnu ah an kuat ṭhan hna hi a si.
2023 November 12 ah India-Myanmar ramri, Rihkhawdar khua um ralkap sakhaan 2 cu CNA, CDF-Hualngoram, CDF-Thantlang le People Defense Army hna nih an kah. Kahdohnak chung in ralkap lei 34 cu Mizoram, Champhai pengkomh, Zawkhuathar ah an zaam. Anmah pawl cu Assam Rifle nih India ralkap Helicopter in Mongnai khua in Tamu ah an kuat hna.
Khampat-Tamau pawngkam kahnak ah SAC ralkap pawl India ram lei a tli mi zong an um.
November 15 ah Falam peng, Tibual ralkap sakhaan in ralkap 40 leng zong India ram ah an rak zaam. Mizoram, Tusentlang khua in Assam Rifle sin ah an i ap i cu hnu ah Myanmar ram, Tamu khua ah India ralkap Helicopter in an kuat ṭhan hna.
2023 November 19 ah Matupi peng, Lailenpi khua hrambunh LIB 304 ralkap sakhaan cu Chin dothlennak phu pawl nih an lak lio ah ralkap chungtel 30 cu Mizoram, Siaha pengkomh ah an zaam ṭhan. Anmah pawl zong India ralkap Helicopter nih Myanmar ram ah an kuat ṭhan hna.
Paletwa peng, Myeik khuate pawng ah a um mi ralkap Point 377 sakhaan cu AA nih December 2 ah an kah hna i ralkap 15 cu Mizoram, Lawngtlai peng, Suisatlang khua in India ralkap sin ah an i dor. January 2 ah Lengpui vanlawng tual in ralkap Helicopter nih voi 2 an thail hna.
Cun Paletwa khua, Chinletwa sakhaan cu AA le MDF nih January 2 ah an lak lio ah ralkap 104 cu Mizoram, Siaha pengkomh chung ah an rak zaam. January 9 ah ralkap vanlawng nih Aizawl khua, Lengpui vanlawng tual ah a rak lak hna.
SAC ralhrang le mipi ralkap cu Lawngtlai pengkomh Parva ral Myanmar ramchung ah an i kah caah 2024 January 17 zanlei sml 4:00pm hrawng ah SAC ralhraang 278 cu Bandukbang Lawngtlai peng ah an rak zaam.
SAC ralhraang pawl hi Assam Rifle nih an tawlrel cuahmah hna. SAC ralhrang le mipi ralkap hi Karma tiva pawnghrawng ah an i kap i atu bantuk in SAC ralhrang pawl Lawngtlai peng ah an rak luh.
India ram chung a rak phan mi kawl ralkap hna kha Myanmar ram ah hramhram in va kuat ṭhan lo in anmah duhning tein tawlrel piak ding a si tiah India for Myanmar nih India cozah sin ah ca an kuat.
About The Author
