SAC Ralkap 4 Hriam He KNU Sin Ah CDM An Tuah, SAC Kan Doh Ṭhan Lai Tiah An Chim
The Chinland Post | 2023 April 20 — SAC LIB 341 in ralkap 4 cu KNU Brigade 5 kuttang KNLA sin ah CDM an tuah tiah April 19 ah KNU thawngzamh nih a langhter.
KNU Brigade 5 hmunhma chung ah hmunhma a khuar mi SAC Battalion pakhat chung in ralkap Toe Toe, Aung Pai Pyo, Ye Htet Kyaw le Cho Lwin Oo hna cu a luancia April 10 ah hriam he CDM an tuah hi a si.
CDM a tuah mi ralkap 4 nih MA-1 zuun 4, Kuan khat tein rawn cia mi kuanbawm 16, Grenade 4 le adang bom lung 5 he an rak i fonh tiah theih a si. Cu leng ah, KNLA Brigade 5 kuttang ralkap pawl he fonh in SAC doh ṭhan ding an i tim tiah KNU thawngzamh nih a langhter.
SAC nih hramhram in uknak a lak hnu 2021 February thawk in 2023 April 20 tiang SAC ralkap le BGF chungtel 70 leng KNLA Brigade 5 sin ah an i fonh cang i cu chung ah Lieutenant le Sniper ralkap 1 aa tel tiah theih a si.
About The Author
