SAC ralkap nih hramhram in thahmi sualnak ngei lo mipi 2,170 leng an um

The Chinland Post | 2022 August 10 – Myanmar ram ah hramhram in uknak lak hnu kumkhat le cheu leng caan chungah SAC ralkap nih sualnak ngei lo mipi 2,172 a thah cang hna i minung 15,078 a tlaih/hren hna tiah Assistance Association for Political Prisoners (AAPP) nih a thanh.

Atu langhter mi cazin hi 2021 February 1 in 2022 August 9 tiang AAPP nih a khawmhsuatmi a si i a taktak dirhmun ah a thimi an tam chin lai tiah a langhter.

Dothlennak chungah August 10 tiang 11,977 tlaih an si rih i cu chungah 1,379 cu thongthlak ding in biakhiah an si.

Dothlennak he pehtlai in thah ding tiah nawl chuah a simi chung in 81 cu hren an si i hriawh in thah ding tiah nawl chuah a simi 42 telh in minung 121 cu hriawh in thah ding tiah biachah an si caah thah ding tiah nawl chuah a simi an zapi te 123 an si cang.

Atutiang ah biakamnak he thlah ṭhan a simi 22 an um i thlah ṭhan a simi 3,075 an um tiah a langhter.

AAPP nih a khawmhsuat khawhmi ah hramhram in uknak lak a si thok in 2022 July thla dongh tiang SAC a hrenh/chuhmi inn 709 nak tlawm lo a um tiah a chim.

Na ruahning rak langhter ve.. (Leave a comment)

%d bloggers like this: