SAC Ralkap Nih Sualnak Ngei Lo Mipi 4,140 Leng An Thah Cang Hna
The Chinland Post | 2023 October 5 — Myanmar ram ah hramhram in uknak lak a si hnu kum 2 le cheu leng caan chung ah SAC ralkap nih sualnak ngei lo minung 4,140 leng an thah cang hna i a tlaih/hren mi minung 25,237 tiang an um cang tiah Assistance Association for Political Prisoners (AAPP) nih a thanh.
Atu cazin hi 2021 February 1 in 2023 October 4 tiang AAPP nih a khawmhsuat mi a si i khawmhsuat khawh mi leng ah a thi mi an tampi rih lai tiah a langhter.
Pau Dothlennak chung, tuni tiang ah minung 19,650 an tlaih/hren cang hna i cu chung ah minung 7,658 cu thongthlak ding in biakhiah an si.
Dothlennak he pehtlai in an tlaih/hren hna i thah ding tiah biakhiah a tong mi 112 an um i hriawh in thah ding tiah biakkhiah a si mi 43 telh in minung 119 cu hriawh in thah ding tiah biakhiah an si caah thah ding tiah biakhiah a si mi an zapi te 155 an um cang.
Atutiang ah biakamnak he an thlah ṭhan cang mi hna 5,587 an um tiah a langhter.
AAPP nih a khawmhsuat mi cazin ning ah, SAC ralkap ruang ah 2021 kum chung ah minung 1,471, 2022 chung ah minung 1,400 le 2023 January in October 4 tiang ah minung 1,270 an thi cang i Sagaing ramṭhen hi minung 1,860 an thi cang i a tam bik an si.
Cun SAC ralkap nih an tlaih hna hnu ah a phunphun in an hrem hna i an thah mi hna hi minung 1,444 an um i tlaih hnu ah meithal in an kah i a thi mi hna hi minung 200 an um tiah AAPP thawngthanhnak in theih a si.
Hmanthlak – SAC ralkap nih 2023 July 7 ah a bu in Welet peng minung 7 an rak thah mi hna (hmanthlak hlun)
About The Author
