SAC Ralkap Nih Thongtla Hna Hriamnam Tlaih Ter In Minung 400 Cu Kanbalu Peng Ralram An Kal Ter Hna, Cheukhat Tongtla Cu Mipi Ralkap Sin Ah An Zaam
The Chinland Post | January 26, 2024 — Sagaing ramthen, Kanbalu peng ah SAC ralkap 400 leng cu ralram an kal ter hna i mi tam deuh thongtla mi cu thonginn luatnak kan i pek hna lai tiah thong chung in an chuah hna hnu ah meithal tlaih in ralram an kal ter hna tiah tualchung mipi ralkap nih MFP media sin ah an chim.
January 24 ni ah SAC chungtel 400 leng cu Shwe Bo pengkomh in Khin Oo peng chung an rak luh lio ah cheukhat cu mipi ralkap umnak ah an rak zaam, mah a zaam mi hna biahalnak ah thongttla hna meithal tlaih ter in ral hmun ah an kal ter tiah theih a si.
“SAC ralkap nih thongtla hna cu thonginn in luat nan si lai tiah thonginn chuah in ralkap thazang thawnnak ah an tuah hi a si. Kan sin a rak phan mi thongtla hna nih cun Meik thonginn in a ra mi kan si, thonginn luatnak kan in pek hna lai ti in meithal an kan tlaih ter. Pakhatnak ah meithal an kan pek. Kuan a um lo. Anmah nih meithal pek kan in duh hna nain kan i pe ngam fawn hna lo, cucaah Shwe Bo ralkap training peknak No. 8 phanh hnu ah meithal an kan hal than, Training pek nan si lai, Training kai dih hnu ah meithal an lak than dih. January 24 ni chun caan ah ralram kal hlan ah Training kainak No. 8 hmun in thongtla minung 7 an tli, a tli mi hna chung in pakhat cu mipi ralkap he an i tong. Mi dang a tli mi hi khua zei an phan ti kan hngal lo” tiah Khin Oo PDF hruaitu U Kyaw nih MFP ah a chim chap.
Shwebo ralkap training peknak No. 8 battalion in motor 28 in SAC ralkap thazang chap ding mi ah mi tam deuh hi Meik khua thonginn chuak thongtla pawng an si i anmah cu meithal tlaih ter in ralram ah ralhmai lam an kal ter hna tiah U Kyaw nih a chim.
Thongtla phu le SAC ralkap hna cu Sagaing ramthen, Khin Oo peng an phanh ah PDF nih landmine tarhnak ah anmah le mah lau ngai in an i kap I an zaam tiah an ti. An zaamnak ah kuan le kuanbawm, bom pawl an thlak ta mi cu mipi ralkap nih an lak.
January 25 ni ah SAC ralkap bu hna cu Kanbalu peng lei in Kawlin lei ah thazang chap in an kal tiah theih a si.
SAC uknak a lak hnu ah Shwebo le Kanbalu peng ah mah bantuk in minung 400 leng ralram kal ter a um bal lo, nain hlan ah cun ralkap minung 100 hrawng nih ralram an kal tawn tiah mipi ralkap nih an chim.
SAC nih ralkap in a tli mi le thongtla pawl chuahter in ralhmun an kal ter hna hi a si.
Photo- SAC ralkap pawl Seiphorh in Mizoram lei a zaam mi hna hmanthlak
About The Author
