SAC sakhaan pakhat KNU nih an lak
The Chinland Post | 2022 September 29 – Karen ram, Kyainseikgyi peng, pura tlang ah a ummi SAC sakhaan pakhat cu KNLA battalion 16 le Special Force nih September 28 zinglei ah an lak tiah theih a si.
Cu sakhaan ah SAC nih Kyainseikgyi ah hram a bunhmi Infantry 283 nih hmunhma an khuar i sakhaan lak kahdohnak hi sml 1 hrawng a rau.
SAC ralkap lei in Deputy Battalion Commander telh in 13 an thi i hriam tampi an lak khawh tiah KNU nih a thanh.
S.O.F nih a thanh ning ah SAC ralkap 17 hrawng nih sakhaan an zaamtak tiah a ti.
Kahdohnak chungah MA4 zuun 1, MA2 zuun 1, MA3 zuun 3, MA1 zuun 5, Sniper zuun 1, 60MM zuun 1, RPG zuun 1, Machine Gun zuun 1, Machine Gun kuan 89, 5.56 kuan 513, kuan bawm 16 hna an lak khawh tiah theih a si.
Karen ram ah a unmi SAC ralkap sakhaan pawl KNU le Dothlennak phu pawl nih an lak thluahmah i a luancia September 20 zong ah Kawkareik peng Kyaiktone lam cungah a ummi Kyaik sakhaan an rak lak i hriam tampi an lak khawh bantuk in hramhram in uknak lak a si hnu ah Thaebawbu sakhaan, Mawkhi sakhaan, Falu pura tlang ah a ummi sakhaan, Wawlay palek sakhaan le Kyaik sakhaan hna telh in sakhaan 5 nak tlawm lo KNU nih a lak cang.
SAC ralkap pawl Karen ram chungah a thi mi an tam i September 9 ah Myawaddy-Wawlay lam cungah a ummi Thaephyochaung gate ah SAC brigade 44 kuttang LIB 102 in Captain Ye Yint Maung le ralkap 5 cu hriam an phorhnak mawṭaw pakhat he KNU nih an tlaih hna i cu kong he pehtlai in Kyaikto hrambunh Brigade 44 Commander in Chief Colonel Tin Moe Naing cu Naypyitaw ah an hren tiah theih a si.
About The Author
