Sagaing Ramṭhen, August Thlachung Khuachung ah Mipi 45 An Thah Hna
Salai Mangpau | August 3, 2023 — Sagaing ramṭhen, August thlachung ah SAC ralkap nih khuachung mipi 45 an thah hna tiah ramkhel thongthla mi zohkhehnak Assistance Association For Political Prisoners (Burma) AAPP nih September 1 ah cathanhnak a tuah.
An thah mi hna hi Pa 36 le nu 9, an dih lak mi 45 an si, a thi mi chung in tlaih lio hremnak ah a thi mi 25 an um tiah RFA Burmese nih a chim.
Cun, nu 5 le pa 6 tiah an dihlak 11 zong tlaih an si rih. SAC nih uknak alak hnu Sagaingramṭhen ah phungning lo le an duhning upadi tuah in thongthlak mi hna nu 16 le pa 54 tiah an dihlak 70 an si tiah AAPP cazin nih a langhter.
Kyuanhla mipi dohthlennak phu cazin ning, Kanbalu peng, August thla ah khuachung minung 11 an thi tiah khuachung mi pakhat nih a chim.
“August thlachung, Kanbalu ah SAC ralkap le pyusawhti hna kut in minung 11 thah an tong. Khuachung ah mi 5 cu sualnak ngei lo in thah an tong. Adang minung 6 cu SAC ralkap operation an tuah lio lampi ah an kahthah hna” tiah khuami nih a chim chap.
SAC nih uknak a lak hnu September 1, 2023 tiang ah Democracy dohthlennak he pehtlai in mipi 4,029 an thah cang hna i, minung 24,632 tlaih an tong tiah AAPP cathanhnak in theih a si.
About The Author
