Salai Cung Dawt; UNHCR Nih Chin Ralzam Cungah Biachahnak A Tuahmi Kong Part (I)
The Chinland Post| 2018 June 19|Biahmaithi: Chin ralzam hmailei dirhmun kong he pehtlai in 19 June 2018 ah Delhi hrambunh Chin ralzam upa hna sin ah UNHCR nih thiehternak a tuah ve cang! Tutan meeting ah UNHCR-Chief pumpak zong aa tel i Protection officer (7) zong nih an kan thutpi hlei ah Chin ralzam kirnak kongah biatak tein hma a la cuahmah mi RSD officer nu, Malaysia in a rak phanmi zong nih an kan thutpi ve.
Zeidang hlan ah Delhi um Chin hruaitu upa cungah lomhnak ka chim ta duh! Delhi Chin hruaitu upa pawl nan biachim mi cungah kan upat tuk hna i kan harsatnak, Chin ram sining le dirhmun fiang tein nan langhter khawh mi cungah upat kan pek hna.
Ahmasa bik ah zapi nih nan theih cio cang mi chungin Chin ralzam cungah UNHCR nih biachahnak a tuah cang mi tawi tein langhter than ka duh. A chimmi le a tial cangmi an tam ko caah a tawi khawh chungin ka rak langhter lai.
Chinram zong a dang tlangcung minung hna bantuk in Kawl uknak tangah a thudir mi kan si ve rih ko nain UNHCR mit in cun a him cang tiah ti kan si cang i, tutan zongah a dang tlangcung miphun/ Kawlram chung ummi miphun vialte lanhtak in Chin miphun tu hmuitinh (target) in nan tlung kho cang, venhimnak pek nan hau ti lo tiah UNHCR lei nih thawngthanhnak an kan tuah tikah ruahding thil a tam ngaingai ko.
Kawlram chungah lut in rian a tuan cuahmah mi hna rights group pawl, Kawlram kong hlathlainak a tuahtu researcher pawl an report (data) tibantuk pinah UN agency lei hlathlainak, UNHCR riantuantu pawl nih an khuamsuat mi catlap vialte kan zohfel dih cikcek i Chinram sining, a tulio Sagaing ramthen dirhmun cu felfai cikcek in hlathlainak (closely monitoring) kan tuah hnu ah Rangoon hrambunh UNHCR siseh, UNHCR Head quarter lei nih biachahnak a tuah i Chin ralzam cu UNHCR venhimnak tangah an um a herh ti lo, an ram kir hnawh awktlak a si cang ko, an ram a him cang timi biahren a chuah hi a si tiah UNHCR-Chief nih achim. Cun India (Delhi) ah ralzam sinak a sok thar mi pawl, a bikin kum 2017 hnu lei i ralzam sinak a sok mi (Asylum seeker) an case pawl zong biatak tein kan zohfel cikcek tikah tihphan awk taktak dirhmun an si lo ti kan theih i an ram i an kir zongah thihnak tiang a chuahpi khotu thihphaihnak aum ti lai lo ti hi kan hmuh mi cu a si a ti fawn. (Hi ka UNHCR-Chief bia nih a langhter chih mi cu Kum 2017 hnu lei ralzam sinak a sok mi an case cu pompiak awk an tlak ti lo, Ralzam si khawhnak definition ah an case a lut lo tinak khi a si ko).
Cu caah kum 2019 December 31 in cun Chin mi caah ralzam sinak cu a dong cang lai i UNHCR venhimnak tangah Chin miphun cu nan lut kho ti lai lo. Nan caah UNHCR venhimnak a dongh taktak cang hnu in cun zeibantuk biachahnak na tuah zongah bawmhnak a um kho ti lai lo i na umnak cozah nih an i dawi i an i tlaihhren zong ah venhimnak kan i pe ti hna lai lo. Cu ruangah ka ram ah kir ka duh ko, ka kir ko lai a timi nih UNHCR sinah biachahnak felfai rak langhter uhlaw, nan tlunak ding le Chinram ah khuasak nan thoknak ding kan in bawmh hna lai ti a si.
Chief of mission biachim mi cungah Chin ralzam upa pawl lei in bialehnak zeimawzat an tauh ve. Nan biachim mi, nan ram sining nan langhter mi cungah hlathlainak zong kan tuah than rih ko lai. Cun kum 2019 December 31 in cun Chin ralzam caah UNHCR kan khar cang lai kan timi a si ko nain a karlak ah nan ram dirhmun cu kan cuanh rih thiamthiam ko lai. Tutan nan chim mi pawl nih nan him lonak tete tampi a langhter ve. UNHCR lei minung pawl he tonnak kan ngei than fawn lai i nanmah he zong tonnak kan ngei than rih lai. Cun nan chim mi vialte hi kan hlathlai ve rih thiamthiam lai tiah Chief of Mission nih lehnak a tuah than.
Zeitik in dah hi rian hi aa thok, zeitin dah hma an lak ning a si lai timi le a hmasa ka facebook timeline in ka tial mi question tlawmpal ka rak peh colh te lai. Riandang a um caah ka ca ka rel manh lo. Ka palhmi um sual ahcun ka rak remh nolh te lai, phone an ka chawnnh ngai cang caah riandang ah ka va kal ta rih lai.
Siaherhnak he
Salai Cung Dawt
Biakilh: Hi cabia cu catialtu pumpak kan hal i a kan kuatmi kan rak langhtermi a si. Dal hnihnak (part 2) kan van peh colh than te lai.
About The Author
