Selena He An I Duh Than Hnu Ah Justin Bieber Nih Duhnak Timi Kaa Fiang Cang Tiah A Phuan

LOS ANGELES, CA - NOVEMBER 20: Singers Selena Gomez (L) and Justin Bieber in the audience during the 2011 American Music Awards held at Nokia Theatre L.A. LIVE on November 20, 2011 in Los Angeles, California. (Photo by Kevin Winter/AMA2011/Getty Images for AMA)

Chinland Post| 2018 January 18| Kum 6 chung aa duh, aa thenmi Justin Bieber le Selena Gomez duhdawtnak lamthluan a hun tluan thannak hi atu ahcun thlahnih tluk a si cang. January 17 ah kum 23 a simi Justin Bieber nih ung kung pakhat aa kuh i lamhlat a zoh lio le a mirh lio hmanthlak pakhat cu Instagram ah a tar. Cu hmanthlak aa tarmi ahcun “Atu cu duhnak timi kaa fiang cang (Now I know what love is)” tiah a tial.
Cuti ca a tialmi le hmanthlak cu an zoh cio hna i cheukhat nih Selena he an tlamtling than lo i maw a si hnga tiah an thin a phang. Cheukhat nihcun hihi an i duhdawtnak a tlamtlin langhternak hmelchunh a si tiah an ti ve. Hiti an duh chel, lamdang an zawh chel lengmang a si hnu ah i tlaihchannak le duhdawtnak an ngeih thanmi nih duhnak timi hi fiangte in a temtuar cang, a hngalh cang bia a si lai ti zong an ti phah.

Justin Bieber cu Selena he an i duhdawtnak lamthluan a tluan than hnu ah Selena kong he pehtlai in hla zong a phuah cang tiah thawngpang a chuak.

Bieber cu Selena ruang ah a thinlung a hung i hliphlau taktak. Selena nih a rian aa zuamning, a fak ngaimi a ngandamnak dirhmun pawl a lonh khawh i zumhnak he fekte in kar a hlan khawhnak pawl kha Bieber nih a hun hmuh than tikah a uar khun. Cu ruang ah Selena he an hun i kawp than hnu in Selena he pehtlai in hlaphuah le chuahding a lung a chuak tuk. Atu ahcun Bieber nih phungning (official) te in a aw aa khumh rih lo nain hlathar caah studio i va kal zokzok lawng kha a duh ko cang tiah amah he aa naihniammi pakhat nih a chim.

Kum 23 a simi Justin Bieber le kum 25 a simi Selena Gomez cu 2010 kum thawk khan an i hmutong cang. 2014 tiang an i duh chel, lamdang an zawh chel tibantuk a hung si lengmangmi anmah pahnih cu vawleicung ramkip in thapetu hna nih an duhdawtmi ngaknu tlangval kawpkhat an hung si.

Selena cu hlasak thiam The Weeknd he lamdang an zawh hnu caan tlawmpal a rauh ah atu bantuk in Justin Bieber he an hun i kawp than hi a si. Justine Bieber le Selena Gomez hi a luancia kum 6 chung an sining zoh tikah atu liklek an i duh i atu liklek lamdang an zawh than ti lengmang an si. Atu cu Bieber nih duhnak timi kaa fiang a ti caah an i duhdaw thai cang lai tiah a zummi zong an um ve. Ramkip in anmah pahnih thapetu hna nihcun i duhdaw thai cang hna seh ti an duhpiak hna.
Ref: Elle, Duwun

Leave a Commnet

%d bloggers like this: