Shwebo University Hmunhma Le Pengkomh Palek Zung SAC Sakhan Drone In Bom An Thlak Hna, Pengkomh Palek Bawibik Telh In Mi 6 Hliam An Tuar
The Chinland Post | February 9, 2024 — Sagaing ramthen, Shwebo university hmun le pengkomh palek zung um SAC ralkap umnak cu dothlennak phu pawl nih Drone in bom an thlak hnawh hna i pengkomh palek bawibik telh in minung 6 hliam an tuar tiah Shwebo pengkomh Battalion 15 Eagle Guerrilla bu in Bo Kok Yo nih Khit Thit Media ah a chim.
February 8 zing 10:15am ah Shwebo University hmunhma um SAC ralkap pawl cu Fixed Wings thiamsang hna nih Drone in bom 2 an thlak hnawh hna i SAC ralkap 4 hliam fak an tuar tiah theih a si.
February 8 zaanlei 2:45pm ah Shwebo khuapi chung pengkomh palek zung cu Fixed Wings thiamsang hna nih drone in bom lung 1 an thlak hnawh hna i pengkomh palek bawibik telh in ralkap 2 hliam fak ngai in an tuar tiah theih a si.
November 25,2023 zing 6:00am ah Shwebo peng um SAC ralkap sakhaan le Pyusawhti thazang 50 umnak Pyu khua a simi Ditidaw, Ngaungkaine le Zephyu khua tiah khua 3 cu PDF nih hriamngan, hriamhme, Drone in an kah hna. SAC lei nih Mi 35 Helicopter in suimilam 1 leng voi 2 rat in kahdoh a bawmh hna, sakhaan pakhat kan lak deng nain vanlawng kahnak ruangah hnu kan pil than tiah Bo Kyar Yaine mipi ralkap bu ṭuanvo ngeitu nih People’s Spring sin ah a chim.
Ditidaw khua kahnak ah SAC ralkap le pyusawhti a thi mi 20 hrawng an si lai, mipi ralkap lei minung 5 hliam an tuar tiah Bo Kyar Yaine lei nih an chim chap. SAC ralkap sakhaan umnak Ziphyukung khua cu an kal tak caah mah sakhaan cu PDF lei nih mei an kangh.
About The Author
