Siaha Auto Rickshaw Mawngtu A Thattu Hna Hi Arakan Army AA He Pehtlainak A Ngei Mi An Si
The Chinland Post | January 26, 2024 — Siaha mi thahnak kongkau ah kannih Network for Unity Association (Mizoram) kan lung a tha hrimhrim lo. Arakan mi lainawng hna hi kan dohkalh hna i ngaihchiatnak tong mi chungkhar kan in tuarpi tuk hna tiah January 25, 2024 ah Network for Unity Association (Mizoram) nih cathanh an chuah.
Mizo Zirlai Pawl (MZP) General Headquarters, Aizawl nih cun Siaha ECM Vaih ah khuasa Zawasa nunnak laak hi a poi ngaingai. Zawasa nih kaltak mi chungkhar nan ngaihchiatnak MZP nih kan in hrawmpi hna tiah MZP nih 2024 January 25 ah cathanh an chuah ve.
MZP nih cun ‘Sualnak tuahtu kawl in, tuanvo latu cung ah lunglawmh bia an chim i hi bantuk in thilsual tuahtu hna hi fakpi in hrem si hna seh’ tiah nawlngeitu nawlnak zong an tuah chih.
MZP nih an langhter rih mi cu ”Hi bantuk in thilsual a tuahtu hna hi Rakhine (Arakan) lei mi an si. Chin hrinsor ralzaam hna he an i pehtlai lo, Arakan Army (AA) he aa pehtlai mi an si hna. Lawngtlai Refugee Camp ah um mi zong an si lo. Vakvai men mi an si, cucaah hi lainawnnak ruang ah nunnak himnak kawl in Mizoram ah a rak zaam mi, zapi , nunau, sualnak ngei lo harsatnak pek hna lo ding in Mizoram zapi kan in nawl hna” tiah an langhter chih.
Lainawngtu hna hi Arakan Army (AA) he aa pehtlai mi an si tiah theih an si i, Lawngtlai ralzaam camp ah um mi an si lo. 2024 January 20 ah an Bike 125 Kenbo chia cu ralzaam camp ah a part a um caah cawk ding in lut mi an si. Myanmar ralzaam nih an tuah bantuk in thawngpang a than hhi a poi ngaingai.
Hi lainawnnak tuahtu Arakan mi hna cu-
- Huku kum 17
- Lewe kum 16
- Ko Ko kum 16, Mizo holh thiam bikk a si, an dihlak in Arakan mi an si.
Myanmar ralzaam a si khawhchung in dirkamhtu siangngakchia bu, NGOs (YMA, YLA, MTP tibantuk bu…) Mizoram mizapi cung ah lunglawmh bia kan chim. Hi thil ruang ah ralzaam cung ah harsatnak a tlun lo nak ding caah Mizoram zapi kan in nawl pat ko hna, tiah Network for Unity Association (Mizoram) nih cathanh an chuah.
“Hi miphun, misual hna ruang ah a kan dawtu kan unau a si mi Mizo hna thinlung ah kannih tiang remlonak le huatnak in an kan um sual ahcun a poi ngai mi a si. Kannih zong ral kan zaamnak kan unau Mizo hna khi kan hmaizah thiam hna in kan țihzah ngaingai hna awk an si. Ralzaam a si mi vialte nih hihnu hmailei zong ah hibantuk tuksum thil hi kanmah le kan miphun chung zong in a chuah ve sual nakhnga lo ngakchia, upa in kan i ralrin thiam cio a hau ngai mi a si” tiah Laimi upa pakhat nih a chim.
January 24, 2024 ah khan Siaha Autorickshaw khaltu, Zawasa Siaha ECM veng ah a um mi cu, Myanmar ralzam pathum nih Lawngtlai kalnak ah an hlan i, Lawngtlai district chung Tipi Ferry pawng ah an thah tiah theih a si.
Zawasa le ralzaam pathum hi Lawngtlai in zaan suimilam 7:00 hrawng ah Saiha lei ah an kir tiah theih a si nain zaan suimilam 9:00pm tiang Zawasa cu a chungle nih chawnh nain an chawn kho ti lo. Nizaan January 25 ah Autorickshaw hi Saiha kiangkap ah a um mi very farm pawng ah hmuh a si.
About The Author
