Tigyaing Peng Nithum Chung Kahdohnak Ah SAC Ralkap 14 Nak Tlawn Lo An Thi Cang
The Chinland Post | January 25, 2024 — Sagaing ramthen, Tigyaing – ထီးချိုင့် peng khuapi ah hram a bunh mi SAC ralkap cu KIA, AA le PDF hna nih January 22 ah offensive in an kah hna caah kahdohnak a fak ngai tiah theih a si.
Tigyaing khua khatlei tiva ral kam um Myant Taung lamton ah SAC ralkap pawl cu January 23 zing ah mipi ralkap nih an kah hna, SAC lei mi 10nak tlawn lo an thi. January 24 ni zaanlei kahdohnak ah SAC lei 4 an thi ṭhan.
January 23 ni zing kahdohnak ah SAC vanlawng kahnak in PDF 2 nih ram caah nunnak an pek.
Tigyaing khua ah November 6, 2024 ni thawk in SAC le mipi ralkap karlal kahdohnak an um cang.
SAC ralkap nih Tigyaing khua Myat Thein Tang tlang cung ah hmunhma an lak. Khuachung sang kip ah SAC lei nih hriamngan, vanlawng kahnak le mei an khangh ruang ah inn a rawk mi an tam ngai. Kahdohnak a um hlan ah tualchung mi a zaam mi an um, cheukhat cu kahdohnak in an thi mi zong an um. Atu ahcun Tigyaing khuachung mipi a um mi an um ti lo. Ralzaam in an um dih cang tiah theih a si.
Tigyaing khua kahdohnak hi KIA, AA le Tigyaing le pawngkam mipi ralkap nih an tuah mi a si tiah Unau hawikom phu 3 thawngthanhnak in theih a si.
About The Author
