Sifak Santlai Lo Aw-Ann
Editor Sin Cakuat| 2018 December 10| NLD cozah a hung chuak lai i ralkap cozah lio i sifak santlai lo zawnruahnak le dawtnak um lo in- cu man ah, kha man ah, cuzat khazat tho u an kan timi phun vialte kha um ti rua lai lo ti na lak ah a tam chin ne hme hi.
Thantlang Ar zuar le Nga zuar pawl kan caah cun ngaihchia a si ko. Nihin tiang hi ralkap cozah sipeng rih hna seh law. Hi tiangtiang hi ngunkhuai (fee) an kan ei lai ti ka zum lo. Ralkap cozah lio te khan Market ah kan thu cang i NLD cozah nih Ar le Nga ngunkhuai (fee) an kan lak ruang i kan lungfah le kan ngaihchiat hi a um bal lo.
Ralkap uk lio hmanh ah khan Ar hi Kalay in Motor nih an vun phurhmi kha kan cawk hna i cucu kan zuar hna i Ar khat ah ks.200 in NLD cozah nih an kan hal. Kan hna a tla lo tuk ko nain cozah cu an kan uktu cu an si i an bia el khawh an si lo i kan pek ko hna. Nan kan lakmi a tamtuk tiin kan chim lengmang zongah san a tlai lo, Democracy cozah an lo lo. Ralkap cozah an lo. NLD Party cu ka tanhtuk mi Party cu si ve kaw, cu ruangah cun kan MP pawl zong cu hawikom bantuk khin ka ngamh hna i NLD cozah nih Ar le Nga ngunkhuai (fee) nan kan lakmi hi a tamtuk tiah a tu le tu ka chimh lengmang hna zongah san a tlai lo.
Ar kan cawkmi zat hi a cozah lei nih cun a kan relpiak i an rel hnu ah hin thilnung a si ve mi cu a vun phurhnak ah an ceiciar i a thi mi an um tawn. Cun a ceiciar i tirawl thathi in a ei duh lo mi cu an derthawm i a zinnak tlawm in kan zuarmi hna an um tawn. An vun phurhnak ruang i a thi lo mi le a derthawm mi cu um lo awk a tha lo an um peng. Cu bantuk pawl zong cu NLD cozah tang riantuan mi nih Ar khat ah ks.200 thiamthiam in an kan lak ko. Cu bantuk sifak santlai lo zawnruahnak ngei lo cozah cu Ar khat ah ks.200 an kan lakmi hi 100 ah 30 nak tam in an kan ei tinak a si.
Sifak santlai lo inn le lo hmanh a ngei lo mi, riantuan man 100 ah 30 a kan la lo dingmi cozah kan herhtuk cang, kan ram nih. Zeibantuk riantuan man paoh Company an si zongah dawr an si zongah Ar, Nga zuar an si zongah 100 ah fang 5 asiloah 100 ah fang 10 a kan la lomi cozah kan ram nih kan herh, ramdang cio bantuk in.
Nga hi an zuarnak khan hi kumkhat caah 5000, nichiarte (neh-sin-ze-koh) caah 150 kha a nga zuarnak ah khan tho u an ti hna. Cu pin ah an nga kha kuangkhat ah ks.2000 an liamter tawn hna i a tu cu kuangkhat ah ks.4000 an ti than hna. Cucu Nga zuar pawl nih a tamtuk tiah an chim lengmang zongah san a tlai lo i a cozah bia cu el khawh an si tung lo i sifak santlai lo inn le lo hmanh a ngei lo mi nih zaangram thluahmah in NLD cozah cu pek peng an si ko.
Kawlram in a hungtlung mi Nga zuarnak ding ah kum khat caah tiin le nikhat caah tiin an liamter hnu hna ah Nga kuang man an liamter hoi hna. Sifak santlai lo le inn le lo hmanh a ngei kho lo mi cung i lung pakhat in va pahnih a chep khomi cozah hi milung an dong tuk cang.
A cunglei i ka tialmi bangkhan Ar zuar le Nga zuar pawl nih ngunkhuai nan kan lak mi a tamtuk tiah NLD cozah sin i kan chim lengmang mi san a tlaih lo mi hi USDP party hi cozah rak tling hna seh law sifak santlai lo inn lo hmanh a ngei kho lo mi kan riantuan man ngunkhuai na kan lak mi a tamtuk tiah chim lengmang ve hna u sih law kan bia an ngeih ka zumh ko. Sifak santlai lo aw-ann a ngaihpiak tu ding cozah kan herh tuk ko cang.
Upatnak he,
Thantlang Market chung thilzuar pakhat
Biakilh: Hi cabia cu TCP hmuh ning le ruahnak aa tel lo pin ah cafang chap le remh mi pakhat hmanh aa tel lo.
About The Author
