Sim Card Pawl Thla 3 Chung Ah Hmatpungṭin Nan Tuah Ṭhan Lo Ahcun Kan Thah Dih Lai Tiah SAC Nih A Thanh Ṭhan
The Chinland Post | 2023 July 7 — SAC nih hramhram in uknak a lak hnu ah mipi caah harnak thil a tuah mi thil lak ah Sim Card Hmatphungṭin tuah ṭhannak zong aa tel ve i a ra lai mi thla 3 chung ah Hmatpungṭin tuah ṭhan lo mi Sim Card pawl cu kan thah lai tiah SAC nih July 5 ah a thanh ṭhan.
SAC nih 2023 January 31 a hnubik rikhiah in Sim Card Hmatphungṭin nan tuah ṭhan dih lai tiah 2022 kum dongh lei ah a rak thanh cang.
SAC kuttang Ministry of Labour, Immigration and Population nih a ngeih mi cazin he aa tlak lo mi Sim Card pawl cu ni 30 – 90 chung ah Hmatphungṭin nan tuah ṭhan dih lai tiah an thanh hi a si.
Cun Sim Card pawl ni 30 chung ah Hmatphungṭin nan tuah ṭhan lo ahcun phone chawnhnak, cakuatnak le Internal hmankhawhnak vialte (One Way Block) an phih dih lai tiah theih a si.
Cun cubantuk One Way Block an tuah hnu ni 90 chung ah Hmatphungṭin tuah ṭhan lo a si ahcun Sim Card thah beh a si lai tiah theih a si.
“Hmatpungṭin tuah ding in MPT le Telenor Operator nih atu le atu phone an ka chawnh. Hmatphungṭin cang mi a si ko nain na Sim Card le kan ngeih mi cazin aa tlak lo tiah an ka chawnh lengmang” tiah Hakha khuami pakhat nih The Chinland Post ah a chim.
Myanmar ramchung ah Sim Card a hmang mi 70 Million an um i Mobile Internet a hmang mi 64.60 Million an um tiah 2023 Digital In Myanmar Report ah hmuh khawh a si i mipi hna nih hman mi Sim Card pawl hi NLD chan ah Hmatphungṭin rak tuah cang mi pawl a si.
About The Author
