Tamu Peng, Tanan Khua Thongtla Sakhan Le Kate-Meitei Sakhan An Lak Khawh, Vanlawng Kahdohnak Ruang Ah Tualchung Mipi 1000 Leng An Zaam
The Chinlandpost | November 28, 2023|
Tamu peng chung um India-Myanmar ramri khua Myothit peng le Tanan khua karlak, November 22 kahdohnak ah Tanan thongtla sakhan le Kate-Meitei tapung sakhan cu mipi ralkap nih an lak tiah theih a si. Kahdohnak ruang ah tualchung mipi 1,000 leng a himnak lei ah an zaam tiah theih a si.
Upper-Tamu peng ah hmunhma a khuar mi Shanni Nationalities Army-SNA, Kate-Meitei hriamtlai cu Kuki ralkap Kuki National Army- KNA-Burma le Tamu pengkomh mipi ralkap tangṭi hna nih November 22 in kahdoh an thawk i November 23 ah Tanan khua cu an lak khawh. SAC lei an tuar fah deuh ngai caah November 24 ah Tanan khua cu vanlawng nih a kah. Inn 200 leng khuasa an umnak Tanan khua le a pawngkam khua Phailin, Sedi, Hmandaw, Nanokmaw, Soe ta in khuami 1,000 leng cu India ram, Manipur State ah an zaam hna.
November 24 ah Mi 35 pathum nih khua pawl cu a kah. Phailin khua zong ah bom a thlak. Tanan khua inn 6 an khangh.
Humalin peng Tonhe khua le Tamu peng Tanan khua kar, Myamar ram lei ahhin 2020 ah Kate-Metei pawl hmun an rak la. SAC nih uknak a lak hnu ah SAC he tangti in mipi ralkap he kahdohnak a chuak tawn. November 23 ni zing 6:00 am ah Kate-meitei tapung sakhan cu KNA Burma le Tamu pengkomh hriamtlai tangṭi hna nih an lak i, hriamnam tampi zong an lak khawh tiah theih a si.
Upper- Tamu peng, Tanan khua he meng 10 an hlatnak Myothit peng zong ah kahdohnak a fak peng rih. Tanan khua hi Sagaing ramṭhen, Upper -Tamu peng he meng 40 aa hlatnak, Tamu- Aungzweya lam cung um ah a um mi India-Myanmar chawlehnak sanpiah khua pakhat a si.
Inn 200 leng um Kuki miphun pawl umnak khua a si I SAC uknak a lak hnu ah SAC he tangti SNA le Pyusawhti phu pawl nih tangka an hal tawnnak khua hna an si.
Ref/ Demiyan/ Zalen
About The Author
