Tayakone khua biakinn telh in mipi inn 50 leng SAC ralkap nih an khangh
The Chinland Post | 2022 August 9 – Thlanglei Kalay, Kalay-Gangaw lam cungah a ummi Tayakone khua biakinn pakhat telh in mipi inn 50 leng cu SAC ralkap nih an khangh tiah theih a si.
August thla thok in Technology University pawngah a ummi Tayakone khua ah SAC ralkap le mipi hriamtlai phufonh karlak ah kahdohnak a fah hnuin cu khua ah hmunhma a khuarmi SAC ralkap nih August 2-4 tiang nithum chungah mipi inn 50 leng an khangh tiah Tayakone khuami nih Khonumthung Burmese ah a chim.
“Nithum chungah inn 52 a kaang, biakinn pakhat zong aa tel, adang biakinn cu an him rih ko, nihnih ni in an khangh cang. Nihnih ni ah inn zeizah an khangh cu theih a si lo nain nithum ni ahcun inn 20 leng an khangh, nili ni ahcun inn 50 leng a si cang. Nikhat ah inn zeizah an khangh cu kan thei lo, a kal zong kan kal ngam lo, nithum chungah inn 52 a ciam”.
Inn 300 leng khuasa an sinak Tayakone khua cu mipi 1,500 hrawng an umnak a si i Chin miphun tambik an umnak khua pakhat zong a si. August thla thok in a cangmi kahdohnak ruangah khuami hna cu Kalaymyo lei ah an zaam i biaknak lei le mipi phu nih an bawmh hna tiah theih a si.
“Atu hi biakinn pakhat ah kan um, kan rak zaam caan hi zaan sml 10:00pm luan hrawng a si caah thil zunnkhat, zunnhnih hrawng lawng kan i phorh hna tikah a tlamtling lo ngai. Asinain kan rak phak tikah biaknak lei nih puan le adang dang an kan pek caah a tlamtling ngai cang” tiah khuami pakhat nih Khonumthung Burmese ah a chim.
SAC ralkap pawl khuachung an rak luh lioah a zaam kho lomi nu, hngakchia le upa telh in khuami 30 hrawng cu SAC ralkap nih an rak tlaih hna i August 6 ah an rak thlah ṭhan hna.
Atulio thlanglei Kalay ah kahdohnak a fah caah Tayakone khua lengah adang Htoutkyan, Kyiain, Tanta le Htunchaung khua hna zong an zaam tiah theih a si.
About The Author
