Tayar Hluttaw Zung Caah Hramhram In GTI Hmun Chuh In An Tahpiak Hna

Salai Ngun San Aung| 2018 July 23| Hakha cu Chin ramkulh khuahlipi a si caah ramkulh cozah zung vialte le Hakha pengkomh zung zong Hakha ah chiah an si. Hakha i ramkulh huap in zung sak mi, cazoh zungpi, tu sak cuahmahmi hluttaw zung te hna zoh tikah motor chiahnak hmanh um huaha lo pitteet taktak in hmun kirkor ah benh an si hna. Atu ah Chin ramkulh Tayar Hluttaw zung saknak ding caah Hakha GTI hmun chung an zoh i an tah cang tiah theih a si.

Hakha GTI nih a tu an umnak siseh a cungbo i inn thar an saknak le a hlan deuh alhhang (datsi) zuarnak tiang khi a dihlak 3.51 ekah tluk an hmun a si. Asinain cu an hmun cu USDP chan cozah ning phunglam ning tein peknak a rak tuahpiak manh hna lo caah NLD cozah chan ah a thar in ca an tial nain mumai aa thlen caah tu tiang anmah vawlei sinak nawl cozah nih phung ning tein an pe rih hna lo tiah theih a si.

GTI cu Chin ramkulh chungah set lei fimthiam cawnnak sianginn kan i ngeihchun pakhat te a si. Hakha khua a hriannak ah hmun thatha le hmun kaukau um ko buin zei ruangah dah Chin rumkulh tayar hluttaw zung nih GTI sianginn hmun theng hi an duh hnga? Chin ramkulh cozah zong nih tah hmundang zohter ko loin ziah pit le teet in hika theng cu ee awm an tlaih ve hna hnga? Hmailei kum sawm tampi ca tiang tuak in kan karh te ding le kan thancho te ding zong zoh chih in khua hriang hmun dawhdawh le hmun kaukau umnak hna ah budget tampi in sak dingmi zung lian pipi hna cu an sak hnga lo timi ruah ahhin khuaruahhar ngai a si.

Hi kong ah Hakha GTI Sianguk Dr. Tluang Za Thang nih a tanglei bantuk in thil sining le sianginn leikap in an duhnak cu The Chinland Post ah a chim.

“GTI hmun hi a hlan tein U Tin Hla chan in an rak chunh i khuathar hoihna nih cun kanmah hmun ah an ruah cia viarmi khi a si. Hakha khuanu khuapa nih Shopping Mall saknak caah siseh, 2015 min cimh lio ah Cyclone Shelter caah siseh an kan hal bal. Cun khuathar zong nih market caah kan duh an ti bal. Asinain kan herh ning ka chimh hna, hmailei ah nan fale kan fale ca cio a si ti ka hna i lungtling tein hmundang an zoh. Hluttaw zung saknak ca zongah Pu Zo Bawi nih kanmah hmun chung hi pakhat nak papek mi ah a chiah nain kan herhning ka chimh i aa thial than. Kanmah hi 2012 lio tein Pu Hung Ngai sinah gram ka rak sok zungzal nain 2015 March an rian tuan caan a dih lai te lawngah pungsan 105/106 an kan suaipiak. Cu ning in cozah chan ah a herhmi dangdang tuah dih hnu ah President sinah ca kan kuat. Asinain Cozah thar nih cozah zung lei he aa pehtlaimi phu (zung) paoh cu vawlei hmun peknak gram chuahpiak ti loin an hman lo ahcun lak khawh than awk a tha ding in vawlei hlanhnak nawl lawng chuahpiak ding timi mu thar an ser. Cucaah kannih kha gram sok ding tiin pungsan 105/106 kan suaimi a rak si caah a thar in rak tial uh tiah an kan khirh. Pengkomh zung kha cunglei chim ning cu ka suaiter than hna.

2017 ah khan Chief Minister nih a ka auh i Tayar hluttaw zung caah nan hmun nan pe kho hna lai maw a ka ti i fak piin kan i el. Kan pe kho hna lai lo ka ti. Asinain kan herh an ti peng caah le keimah zong nih chim tawk ka chim cang ko buin an kan hal peng caah a sile tah ko ne uh ka ti hna. Kan tah i kannih kha 2.6 Ekah le annih kha 0.722 Ekah tiin kan tah. Cu hnu ah Bogyoke zuklem chiahnak caah an ti i pe 200 sau, pe 40 kau an kan hal chap i an i tah. Cucu Chin ramkulh Cabinet zong nih an fehter cang mi a si. Cuti ning cun kan um ko i ramkomh sakremhnak minister pa a hung tlun tikah hmun nan tahmi a bi tuk GTI hi nan en deuh hna a hau tiah a ti hna i kan tah lai an kan ti hoi. Kanmah hi pe 192-38 dothnih cacawnnak inn pakhat, pe 150-75 dotkhat pakhat sak ding kan ngei. Cu vialte caah kan herh dingmi kauh kha ka chimh hna. Hmun cu kan tah i annih kha 0.788 ekah an tah. Cun Bogyoke zuklem chiahnak ding hi aa pitteet tuk i Martyr Ni hna ah chuak cio usilaw zeitin hmanh in kan i tlum lai lo. Hmundang va kawl ulaw kannih ca zong ah a rem deuh lai ka ti hna i cu bel te cu an kan awm.

Pakhat te an i palh tuk mi cu GTI nih inn kan sak mi hi degree i peknak (Convocation) Hall saknak caah an hman hnik tiah an kan ruahmi hi a si. Convocation Hall siloin Convocation Hall aa telmi cacawnnak nak khan hnih he inn nganpi sak ding kan timhmi a si. Chief Minister nih Vice President Pu Henry Van Thio sinah cuticun a chimh ruangah VP nih Convocation Hall cu Hakha College ah kan sak lai i an i hrawm cio ko lai cu ta a ti. Convocation ca lawng a si ahcun VP chimmi hi a dik ko. Asinain cacawnnak khan nganpi sak in convocation caah hman ding kan timhmi khi a si. Cun Sianginn cu inn pi lawng a dir in a za lo. Cycle chiahnak, motor chiahnak hna a herh i Tayar Hluttaw zung hna cu taza aa cuaimi zong an um te lai i siangngakchia he zong buainak a chuak kho.”

Hi kong cu Tayar Hluttaw ramkulh lutlai U Soe Myint kan ton nain cunglei nih an tawlrel mi a si caah thil a fiang rih lo i zeihmanh chimrel awk tha kan si rih lo tiah a kan ti.

Dr. Tluang Za Thang nih, “hihi cu kan kheng chung sa an kan chuh hnik bantuk bak a si ko. Cun GTI sianguk hi keimah rak si loin miphun dang hna rak si hna sehlaw Tayar Hluttaw zung lawng lo a dang inn hmanh an rak saknak a sau tuk cang hnga. Keimah pumpak ca a silo, kan miphun ca a si caah ka dirpi peng nak a si” tiah a chim chap.

Hakha GTI ahhin Siangngakchia-506, Major 4, Cachimtu 66, Staff-34 an um i tu an ngeih cia mi inn pawl khi cacawnnak khandal zong a fawilan nak lawng tein tuah chungmi a si caah cacawnnak ca zongah harnak tampi an tong i hmailei ca tiangah rinhchan awk tlak inn-lo an si lo tiah kan theih.

Leave a Commnet

%d bloggers like this: