Hakha Ah Hmunthur Rialnak Seh Kan Herh

Salai Ngun San Aung| 2018 July 27| Chin ramkulh khuahlipi ah hnawm rialnak seh kan ngeih lo ruangah harnak tampi kan tong i sipin nih le budget rikhiah in a cawlmi an si, kan ngunkhuai le zeihmanh a chuah fawn lo caah khuanu khuapa le mino phu pawl nih hnawm rialnak seh kan ngeih khawh nak ding khua khan a herh.

Hakha ah sang 8 kan um i cu chungah sipin nih hnawm an khawmhmi sang 6 lawng a si. Hakha thar sang hnih cu sipin an kal kho lo. Sipin nih hnawm khawmhnak motor pali le riantuan tu minung 12 an ngeihmi chung in motor pahnih cu a rawk tiah kan theih. Hakha thar chim lo sang ruk chung lawng ahhin inn 5000 tluk kan um tiah sipin nih an chim.

Inn 5000 tluk ahcun chungkhar in a tlawmbik 6000 leng kan um i dawr a thong ti awk in a um i zung an si rih. Cu vialte kan hmunhmur cu motor pahnih lawng nih a khawmh tikah nifatin te an i chawk ve ko nain zeitin hmanh in an tei lo caah khuachung thianhlimnak caah tampi kan chambau rih. Cun kan hmunthur cu a mah ning in motor cung ah chuan a si tikah inn li nga hmunthur kha motor khat a si. Nikhat ah motor pahnih in voikhat an khawmh a tam bik inn 100 hmunthur le an motor nih a tlum lo ti khawh a si. Cucaah kan hmunthur pawl hi a rialnak seh a um ahcun rial cia in motor nih a phurh lai i voikhat inn 1000 tluk hmunthur kha motor pakhat nih a tlum cang lai. A tu cu hi sang ruk chung hmanh ahhin Bogyoke lam thlur pi a ummi pawl kan hnawm lawng an khawmh khawh.

Khuahlipi pakhat kan si tikah khua aa dawhnak a bia pi, khua dawhnak dingah pakhat nak cu thianhlim a herh. Nihin kan hmunthur fimhlawm ning lawng cun zeitik hmanh ah khua thianghlim kan si kho lai lo.

Hmunthur rialnak seh hi pakhat ah sing 1000 leng a si caah sipin budget chungin cawk ding a fawi lomi a si. Zeicaah tiah Sipin cu mizapi nih ngunkhuai kan pek mi zoh chun in budget pek mi an si. Laitlang cu kumkhat ah billion 140 leng cozah nih an kan pek i kanmah tein ngunkhuai kan pek mi hi 7 billion lawng a si. Kan hmuhmi nak in kan hman mi hi let 20 in a tam. Cun sipin caah hmunthur rialnak seh pakhat cawknak ca hi sing 1000 hman nak in a dang herh a biapi deuh mi a um len caah cawk a fawi lo. Asinain a tu hi Hakha peng Sipin Executive Officer pa nih MP pawl hnatlaknak ca tial piak mi he seh pakhat cu cozah sinah a hal i a kan pe lai maw pe lai lo timi a fiang rih lo.

Cucaah President maw Vice President ti bantuk nih an kan tlawn caan ah Hakha khua nu/pa, CYO le a dang dang zatlang bu pawl vialte min in cunglei upa sinah dengteo hal sisehlaw an kan pek lai ding zumh a um. Cucu sipin EO zong nih zatlang bu upa sinah tu le tu ka chim lengmang mi a si a ti.

Cun Hakha sipin nih hmunthur thletnak ding caah hmun rikhiah mi pahnih an ngei. Matupi lam Cawbuk lonh ah le Rual U thlan No.1 le Khuathar thlanhmun karlak ah a si. Mah tein hmunthur aa thlet mi chungkhar cio zong nih cu ka dah ti lo hmundang ah hmunthur thlet lo ding ti a si. Hi hmunthur thletnak i an thlet mi zong hi pawngkam kokek thinghram lei mit min in zoh tikah ningcang a ngei lo ngai ngai mi a si. Matupi lam thlang i an thlet mi hna cu a cheng ah an thlak sawh sawh i a thlang lei ah tiva a um. Cu tiva cu a va phak ding a fiang tuk mi a si.

Cucaah kan hmunthur hi ningcang tein fimhlawm khawhnak dingah cun hmunthur rialnak seh cu khuahlipi pakhat a simi nih kan ngeih hrim hrim a herh ko.+++

Biakilh: Mah cabia cu catialtu pumpak ruahnak a si.