Tayar Hluttaw Zung Sak Ding Mi Kongah GTI Siangngakchia Nih Lungtlin Lonak Cathanh An Chuah

0

Salai Ngun San Aung| 2018 July 31| Hakha GTI siangngakchia nih an sianginn caah cozah sin an hal cia mi inn hmun cu Tayar Hluttaw zung saknak caah an tah piak mi hna kongah an lungtlin lonak le thil sining fianhnak cathanh an chuah.

Cu cathanh an chuahmi ahcun thil pali an langhter.

(1) Ekah pakhat hmanh a tling lomi hmunhma chungah a pipuam ngai ngai dingmi chin ramkulh tayar hluttaw zung sak ding timi hi aa tlak in kan hmu lo. Cun GTI sianginn he aa naihtuk caah siangngakchia le zung lutchuak mi kar ah a herh lomi buaibainak a chuak kho mi a si.

(2) Kan sianguk pa nih a sok cia mi ekah 3.51hi tling tein kan hmuh lawngah kan sianginn caah a herhmi cacawnnak, lentecelhnak inn le siangngakchia umnak inn tibantuk sak nak a kan daihding a si i siangngakchia 800 tluk caah cycle motor chiahnak zong a daih ding a si. Siangngakchia umnak inn zong sak piak kan herh tuk nain saknak ding vawlei hmun a za kan ngeih lawngah saknak ca tangka hmuh ding kan si.

(3) 2018-2019 tangka kum chungah pek cangmi inn sak nak ding zongah luhnak lam a um ding a silo.

(4) Cun degree peknak (Convocation Hall) ti siloin convocation hall aa telmi cacawnnak inn dothnih ti tu a si.

Hi kong ah GTI Principal Dr. Tluang Za Thang nih, “Tayar Hluttaw zung te hna cu pipuam tak tak in rumra ngei ngai in hmun kau pi ah an sak awk a si. Hika i annih ca zong pit le tet kannih ca zong ah chuhdawh in tenh chih an duh hi ka khuaruah a har. Khual zong nih lenkai le zoh a tlak mi in khua leng hmun rem an sak i humhimnak tu tha tein an tuah ding a si. A tu lawng an zoh awk a si lo, hmailei kum kul sawmthum khi an cuanh ding a si. Cun Hakha Education College hi an hmun ekah 40 a kau. A tu khi ekah 50 an hal chap i a dihlak ah ekah 90 kan duh an ti. Education College nak in GTI ah siangngakchia zong an tam deuh. Education College ekah 90 pek lio ah GTI ekah 3.51 hmanh pek loin chuhdawh timh hi cu a mak ko. GTI hi hmailei ahcun major zong hleili hleinga tiang chap khawh mi a si. GTI sianginn ahhin keimah siloin miphun dang pa nih rak tuan sehlaw hi bantuk zong hin a buai hnga lo, a duhmi paoh nih inn an sak cang hnga” tiah TCP ah a chim.

Hakha GTI ah a tu lio siangngakchia minung 500 fai an um i cachimtu 35 le zung riantuan minung 65 an an um.

About The Author

Na ruahning rak langhter ve.. (Leave a comment)

%d bloggers like this: