Thantlang Datsi Zuar Mi Paoh Kumkhat Voihnih License Tuah Le Ks. 40,000 Ngunkhuai Pek Ding
Salai Elvis| 2018 March 12| Thantlang khuachung datsi (alh hang) le dizel zuarmi paoh nih kumkhat ah voihnih license tuahding le ks. 40,000 ngunkhuai pek ding in biakhiahnak an tuah tiah thawng kan theih.
Mah ni ah Datsi zuarmi hna le sipin Committee hna kaphnih lungtling in biachahnak an ngei. Kumdang ahcun kumkhat caah datsi zuar pakhat nih 20,000 sipin ah ngunkhuai pek a si nain tukum thok in thlaruk dan ah 20000 ngunkhuai an pekter hna hi a si.
“Cozah budget kum aa thlen cang lai caah April thla chung ah datsi zuarmi nih License sipin ah nan tuah dih lai i license catlap cu nan datsi zuarnak cio ah nan tar dih lai. Cu license cu thlaruk ca, September thla chung tiang lawng a si lai. Cun October in License nan tuah than lai i a hmaikum September thla dih ca tiang a si te lai. Cu caah ngunkhuai kan hal tik hna ah thlaruk ca lawng a si nak kong kha an theihnak hnga datsi zuar mi hna he ton biaruahnak kan ngeih hnu ah kap hnih lungtling tein thlaruk caah minung pakhat nih 20,000 ngunkhua pek ding in biakhiahnak kan ngei” tiah sipin committee Pu Biak Tha Cung nih TCP ah a chim.
Datsi zuar minung pakhat nih a luancia kum ah cun kumkhat caah 20,000 lawng sipin ah ngunkhuai pek a si. Asinain tukum in Cozah budget kumrelning aa thlen ruang le ngunkhuai pekmi zong khua thanchonak ca i hman a si ko lai. Ngunkhuai tum le kaiter zongah ramkulh zung tiang ca chiah a hauh caah thlaruk caah 20,000 ning in pek si ko seh tiah sipin nih an forhfial hna caah kaphnih lungtling in biabiachahnak an ngeih hi a si.
Thal caan a si cang caah khuachung ah datsi zuar lo ding zong biatak tein ralrin pek an si. Atu lio Thantlang khuachung datsi zuar minung 40 renglo an si i datsi zuar pakhat nih tengki pakhat cung i chiah a ngah lo tiah theih a si. +++
About The Author
