Thantlang Khualuh Hauka Dinhhmun Thar Tuahmi Zuuri Nih An Hrawhpiak Colh Hna
an hrawh hnu le thudan cung ah zuu palang an khuaitakmi
City Hunter| 2018 January 31| Thantlang khualuhnak hauka ah dinhhmun thar an tuahmi cu January 30 zan ah zuuri pawl nih an hrawhpiak colh hna tiah kan theih.
Dinhhmun thar tuahmi ah zuu an ding, thutnak tuahmi zong lung in an cumh i an hrawh pin ah pape 150,000 cheu man zong an khuaipiak dih hna. An zuudinnak palang zong thutdan cung ah an khuaitak rih. Mi zei nihdah atu bantuk in an hrawh timi cu an hngal kho rih hna lo. Cu an hrawhmi pawl cu tuanvo ngeitu nih an remh than lio a si. Hi thilri tuah cuahmah liomi a hrawktu cu an hngalh sual hna ahcun fak taktak in dan an tat hna lai tiah TCP nih kan theih.
“Hi hmun kan tuahnak cu Thantlang khua chungah nuamhnak le lam lennak hmun hma tha a um lo tikah a tu bantuk in penguk zung le sipin i bawm in kadang budget hal lo tein kan tuah hi a si. Hi hmun ah hawi le kom in siseh chungkhar in siseh tlonlen a duhmi nih tlonlen khawh a si i zan ah mei phu tohnak zong tha ngai in kan tuah i cu ah cun hlasak le tlonlen khawh a si. Hi chungah hmunthur zong hlonh sawh lo in a chiahnak te ah tha tein fim khawh i zuam cio u si. Tlawmpal ah khuacuanhnak (view point) zong an lim lai. Hi hmun hnih ah mino pawl zong zalong tein lam len khawh a si cang lai” tiah Thantlang penguk bawi U Swam Htet nih The Chinland Post ah a chim.
“Pangpar dum hmunhma zong hmaikum leiah tuah timh a si ko. Atu lio ahcun vawlei le tangka lei kan chambau rih caah a si. Atu dinhhmun kan tuahmi ah thutnak le meiphu kaunak hmunhma zong tha tein kan tuah dih cang, a rauh hlan ah hman khawh a si cang lai” tiah U Swam Htet nih a chim.
Atu bantuk in Thantlang khua dawhnak le tamhmuaihnak caah penguk zung le sipin i bawm in khuachung ah pangpar dur (flower box) zong hmun tam nawn ah an chiah cang tiah theih a si. ++++
About The Author
