Thantlang Hotel Zone Saknak Ekah Zat Le A Hmunhma Pek Ding A Fiang Rih Lo

Salai Elvis| 2018 April 9| Thantlang ah khua ah Daw Tin Tin Lwin nih area nan ka pek khawh ahcun Hotel kan sakpiak hna lai tiah Thantlang khuanu khuapa sin ah a rak halmi hna cu a tu ni tiang a hmun le ekah pek ding a fiang rih lo tiah tuanvo ngeitu pakhat nih a chim.

“Hi kong kanmah nawl in ekah 50 peknak nawl kan ngeih lo pin ah Chin ramkulh cozah hmanh nih peknak nawl an ngei fawn lo. Ekah 50 pek ding ah cun cunglei lawng nawlngeimi an si” tiah Pu Lawm Bik nih a chim.

 

“Amah Daw Tin Tin Lwin nih ekah 50 tizong a kan hal lo, kanmah zong nih ekah 50 kan in pek lai ti zong bia kan kamh fawn lo. A hmunhma zoh ding in Tluang Thang nih keimah an ka thlahmi ka si a titik ah a si le si lo cu anmah lei kap in ca an tialmi le thawng an kan thanh chungmi zong a um lo tikah an rak thlah mi hi kan zumh le zumh lo kha a si fawn lo i a fek lo tiah kan ruah ve. Anmah pumpak rak tlung in area cu zat cu kan duh tiah an ti hnu ah khuami hnatlaknak tein area cu kan in pek ve hna lai timi biachah kha kan duhmi a si. Anmah zong hika Thinghual tlang hi nan duh maw duh lo ti zong hal an hau. Hi kongah zeihmanh bia a fiang rih lo. Pawhte rawn, Thinghual tlang hi a tha bik lai tiah a hmun kan zoh chung bia tu a si” tiah hi kongah tawlreltu Pu Lawm Bik nih The Chinland Post ah a chim.

“The Backyard Travels & Tours, managing Director Salai Ngun Za Hmun nih a hi kong ah a tialmi ka hmuh. Catialtu pa le anmah Daw Tin Tin Lwin te an rian cu aa dangmi a si fawn tikah careltu hna nih zei lei hoih in dah a tial timi kha careltu hna nih ruah thiam a hau. Ekah 50 zong hi kan in pek hna ti zong ka ti lo. Peknak nawl zong kan ngei fawn lo, ekah 50 cu Chin ramkulh cozah hmanh nih peknak nawk a ngei lo mi khi a si. Ekah 4.99 lawng hi peknak nawl an ngei. Ekah 50 cu Pyi-Oo-Lwin le khuapi deuh lawngah pekmi a si. Kanmah Thantlang chung dirhmun hna i ekah 50 pek ding cu a si zong si kho lo mi a si” tiah a biapeh ah chim.

Hi thil felfai tein peknak ding kongah khuanu/pa, Hluttaw palai hna le tuanvo ngeitu hna i ton hnu ah an ceih than te lai tiah theih a si. Atu bantuk in Hotel le khualtawng tawlrel phu a si mi Daw Tin Tin Lwin nih Thantlang khuanu/pa sin ah hmun nan kan pek khawh ahcun Hotel kan sakpiak hna lai tiah February thla ah bia a rak kamhmi hna a si. A hmun zong a voikhatnak March 16 ah Pawhte rawn, Thinghual tlang an zoh tiah theih a si.+++

Na ruahning rak langhter ve.. (Leave a comment)

%d bloggers like this: