Thantlang Peng Ah Vok Man A Tha; Inn Khat Nih Vok 30 Tluk An Zuat
Salai Elvis| 2018 April 9| Thantlang peng khua cheukhat ah Vok man a tha i Hakha le Thantlang ah sumh thum fai vok pakhat ah ks.190,000 a phan i inn khat nih buaktlak in vok 30 hrawng an zuat tiah theih a si.
“A cawtu hna nih cun a fak tuk an ti ko nain a duh takmi hna nih cun an i lak fawn ko. Lak chinmi hna a si ahcun sumhthum fai ah ks.180,000-190,000 tal kan zuar lo ahcun aa tlak lo tuk ve cang. Falam lei deuh ah hin Vok ci kan lak i Hakha, Tahntlang le Mizo ram deuh ah hin kan zuar khun.Vok tlei zong hi a pum rua aa dawh mi le a tha mi pawl pakhat ks.80,000 in kan zuar hna. Inn khat nih a buaktlak in vok 20-30 a zuami zong an um len. Vok kan zuarnak chungah a nu nakin a pa hi mitam deuh nih an duh khun i a cawtu hrim nih a nu cu a duh an duh bak lo” tiah Thantlang ah vok zuartu Van Ram Uk nu The Chinland Post ah a chim.
Thantlang peng ah a tu bantuk in khuapi chungah Vok a rak zuar deuh mi hi Khualhring tlang deuh an si i, Khualhring tlang chung ah Mualkai le Tlangte khua ah hin Vok a tam khun. Hi chung ah Zolo tuah in vok a zuami an tam khun tiah theih a si.+++
About The Author
