Thantlang Khuachung Ah Mifir Pa Nih Inn Hnih A Baoh: Tangka 90,000 A Fir

Salai Elvis| 2019 June 7| June 5 zing suimilam 10:00-11:00 kar ah, Thantlang khuachung sangthen Market sangum Pu Rung Ling inn le Pu Lal Thio inn cu suimilam pakhat chungah a inn hnih ning in a baoh caah tangka 90,000 a fir tiah kan theih.

Hi chungkhar pahnih cu inn pa an si i TABC sang mithi inn an len kar te le inn hngak mi Nau Rem dawr a len kar te ah a tu bantuk in an inn an baoh hi a si.

“Zingka 8:30 tluk hrawng mithi inn ah topi ding in kan kal hna. Kan inn hnih hi a kilkam deuh khuavelnak lamkam ah kan um caah inn hngaktu Nau Rem (Pu Rung Ling fanu) a um ko nain, dawr ah a fa caah kedenh an cawk kar te bak ah inn an baoh hi a si. Nau Rem inn a lawi hnu in an hmuh ve cio in an kan chawnh i kan lawi tik ah cun kan inn hnih ning innka tawh a rak hrawh, inn chung Bizu, thingkuang chung thliri a rak chuah dih” tiah Pu Lal Thio nu pi nih TCP ah a chim.

“Kan coka lei inn ka in tawhhrenh sawngviar in a den nain a baoh khawh lo caah inn pi lei kutka lei tu a baoh i inn chung thilri cu a rak chuah dih nain tangka le kan thilri dangdang cu a tlau lo. Kan inn pa nu nih a hmuh ning ah inn chungah mifir a um ti ka thei lo, Nau Rem tiah ka auh lio ah nan inn chung in a chuak zau i nan in thlang lei in a zam. Mifir hi pa a si i pa tungno si seh law a dawh tiah a chim” tiin Pu Lal Thio nupi nih a chim.

Pu Rung Ling te inn zong an coka tawhhrenh baoh in a luh caah Bizu, thingkuang le Swetcash tawh vialte baoh in thilri a chuah dih ve. A dang thilri lak lo in an tangka 90,000 tu a lakpiak hna tiah kan theih.

“Mifir pa a duhmi hmanh kan ngeihpiak kho lo le si lai a dangdang thilpuan cu a tlau lo tangka 90,000 lawng a tlau” tiah Pu Rung Ling nih TCP ah a chim.

Hi kong ah palek an chawnh hna tikah a mui nan hliah lo mi cu a kawl hawlnak a har ngai lai a si nain kan rak hlathlai ko lai tiah inn ngeitu hna cu an cah tak hna.

2016 kum lio ah an inn rawkmi

Tutan inn baoh piak a tongmi Pu Lal Thio le Pu Rung Ling te chungkhar cu a luancia kum saupi chung TABC sang ah khuasa mi an rak si nain 2016 August 21 hrawng ruahsur nak nih an inn a hrawh caah cozah lei tuanvo ngeitu hna nih a tu an umnak Market sang (khuavelnak lam kam) ah an thialkamter mi hna an si.

Thantlang khuachung a luancia kum ah a tu bantuk in Dawrkhan, Zuu dawr le inn baoh nak a chuak lengmang nain mizei dah an si timi an hngal kho thai hna lo tiah theih a si.

Leave a Commnet

%d bloggers like this: