Thantlang Market Sa Cuai Tickle An Thumh Nain Sa Cuaikhat 8000 A Phan

Salai Elvis| 2018 October 17| Thantlang khuachung market sathahnak cu cuaitling lo Tickle 85 ah tuanvo ngeitu sipin nih an thumhpiak than hna nain sa man cuaikhat ks. 8,000 in an kai tiah theih a si.

Hi kong he pehtlai in sipin nih Budget thar (2018, October in 2019 September tiang) chungah cuai tling 100 bak in zuarter ding License cawkzuarnak voithum tiang rak tuah a si. Asinain, sa that mi hna nih an ngamh lo i License latu a um ding an si lo caah License cu tickle 85 in zuarter than ding in sipin le nawlngeitu hna nih an thumhpiak than hna hi a si.

“License cawkzuarnak rak tuah lio ah cuaitling 100 bak in nan zuar lai an kan ti caah satil man a fak tuk le zeiti hmanh in kan ngamh lo kan ti i soknak ca kan chiahmi cu kan laak than. License latu an um lo caah avoi thumnak an zuar lai ah kan i tong hna i anmah nih tickle 85 in cun zuar ko u an kan ti than caah tickle 85 in cun kan ngah i kan laak ve” tiah Biakinn sang sa thahnak tlaitu Nau Cung nih TCP ah a chim.

“Cuaitling bak zuar dingin voihnih tiang License cawkzuarnak kan tuah, ahohmanh nih an la duh lo. Avoi thumnak License a latu an um lo ahcun mizapi sa lo in hme kan um lai cu timi ruahnak zong a um. Cucaah khuanu/pa le mizapi ruahnak kan halmi hna chungah sacuai tickle 85 in a si ahcun kan lung tling ko timi ruahnak zong a chuak ko nain kanmah lei nih kan duh ve lo. Cuai khat 10,000 in zuar ve i cuaitling bak si ve seh tiin a man hei kai u si. Tukum ah cuaitling ko hmanh seh hmaikum lei ah a tling kho ti hlei lai lo. Mizapi tangka lam kan sung timi ruahnak zong a um than. Hi kongah Hluttaw le Cabinet zong nih an ceih cangmi a si. Cucaah tickle 85 bak in zuarter hna i hi chungah tickle pakhat te a zor sual ah cun an License chuh ding tiin biahrennak rak tuah a si” tiah Sipin committee Pu Obed Nawl Ceu nih TCP ah a chim.

Sacuai kong ah phungning in sasen (caw, naa le sia) cuaikhat 8,000 le Vok 7,000, saruh 4,000 in zuarter an si. Asinain, atu lio market sathat mi hna nih anmah nawl in vok sa cuaikhat 8,000 ah an kaiter tiah theih a si.

“Voksa cuaikhat 8000 zuar dingin cunglei ah rak kan chimhpiak u, kan hmuhmi le a man aa tlak lo an kan ti caah tukum thlaruk chung (Mini budget) ah khan kan rak chimhpiak hna. Asinain 8,000 in rak zuar ko u timi cu cunglei nih an kan thanh rih lo. Voksa 8,000 in an zuarmi kong ah voikhat kan auh hna. Sathat mi nih an kan lehmi cu a sa thatnak (a pawng-ta) cu 8,000 in kan zuar ve ko i sa caw mi zong an lung tling ko an kan ti. Asinain phungning a si rih lo, zuar rih hlah u tiin kan cah ve ko hna” tiah sipin lutlai Thluai Iang nih TCP ah a chim.

Atu lio Thantlang khuachung satil man pawl cu Sia le Naa pumkhat ah sing 8 in 13 kar. Caw pum khat ah sing 5 in sing 8 kar le vok sum nga (letma 20) ah 300,000-330,000 karlak an si.

Atu lio Thantlang khuachung sa thahnak License cu Biakinn sang Market lawng License ngeimi an si i sianginn sang sa thahnak cu a duhmi paoh nih sipin ah ngunkhuai pek ta i sa va thah khawh a si tiah kan theih.

Na ruahning rak langhter ve.. (Leave a comment)

%d bloggers like this: