Thantlang Peng Kumkhat Chungah Sianginn 24 Level Sanhpiak An Si
Salai Elvis| 2018 June 7| 2018 kum chungah Thantlang peng fimcawnnak sianginn 24 level sanhpiak asiloah an dirhmun cawisanpiak an si tiah theih a si.
Hi sianginn chappiakmi cu siangniamruun in sianglairuun, sianglairuun in siangsangruun tibantuk in 2018 kum chungah sianginn 24 tiang level an sanhpiak hna hi a si. Cu hna cu; a-ttha-kah sianginn 3, aa-la-kah sianginn 12, aa-la-kah (khuai) sianginn 5, aa-ma-kah sianginn 1 le aa-mah-kah (khuai) sianginn 3 a zapi 24 an si.
Thantlang peng chungah aa-ttha-kah sianginn 7, aa-ttha-kah (khuai) sianginn 7, aa-la-kah sianginn 25, aa-la-kah (khuai ) sianginn 11, mu-lunn sianginn 39, aa-ma-kah sianginn 22 le aa-ma-kah (khuai) sianginn 5, a zapi sianginn 116 a um cang tiah Thantlang peng fimcawnnak zung in theih a si.
Tukum chungah Thantlang peng sianginn chap tharmi hna caah cachimtu saya/mah te chiahpiak an si rih lo pinah rianphawt zamhnak an ngei rih hna lo. Kadang sianginn cu zarhkhat chung tluk biatak tein ca an cawng cang tiah theih a si.
“Sianginn lawng chap i cachimtu saya/ma te chambau peng rih cu a sullam um lo mi a si. Asinain tukum Thantlang peng tanghra sunghawn zoh tikah cunglei upa le rianngeitu hna nih an kan zoh sawhsawh bal lai lo. A that ningin khua an kan khanpiak te ko lai” tiah upa pakhat nih TCP ah a chim. +++
