Thantlang Education Volunteer Team Nih Free In Siangngakchia Fim Cacawnnak An Tuah

0

Thantlang khuachung (Photo: Lailungrawn)

Salai Chuncha| TCP-Thantlang| 2021 February 25 |  Thantlang khua ah Thantlang Education Volunteer Team nih Feb 24, 2021(Wed) ni Siangngakchia fimcawnnak cachim an thok. A hmun cu Thantlang Zunghmun Sang, National Unity Party (Setana Boarding School) zungah a si. Hi hmun ah fim a cawngmi siangngakchia hna cu tang 8 – minung (65), tang 7 – minung (84), tang 6 –  minung (117), tang 5 – minung (82) an si i an zapi minung (348) an si i min ai pe mi an um len rih tiah thawng kan theih.

“Hi team hi zeibantuk mino phu hmanh nih dirh asilo i kanmah hawikom rual biaruahnak in kan dirh i thukfak ngai in karhlan kan i tim,  team members minung 11 kan si, cachimh a kan bawmmi he kan zapi minung 14 kan si team members hna nih mahle siantawk cio i thawh in fimcawnnak ah aherh mi thilri (cafung, textbook…tbk) kan cawk, hi thilri nih zeitik tiang kan fimcawnnak a kan nguh lai kan hngal lo nain siangngakchia nulepa sin zongah bawmh hal kan i tim lemlo an kan bawmh duh ahcun anmah lungtho in kan bawm ko hna seh. Vawleipi pulrai covid-19 le atulio kan ram boruak ruangah kan nua le mino tete sianginn kai loin caan sau an um lai le ca he an i hlat lo nak hnga ca ah hihi kan tuah mi asi. Tang 5 in tang 8 Siangngakchia lawng cohlan kan i tim nain sianginnkai kan ngai tuk, kan kaiter ve ko uh tiah amah pumpak in a kan chimmi tangli siangngakchia tampi an um caah kan khumhchih ve hna” tiah tuanvo ngeitu Salai Van Thawng Lian (Master M1, History) nih The Chinland Post ah a chim.

” Ngandamnak zulhphung he aa tlak in Sianginn hi kan kai ko i atutiang kan dirhmun ahcun ngamdamnak lei siseh cozah zunglei zongin dawnhkhannak a um lemlo. Hiti ning tein kan kal khawh ko ahcun kan naule hna Cozah sianginn ah fim an cawn khawh than hlanlo cu pehzulh kan i tim ko, hi thil kan tuahmi ruangah zeithil poh kan va ton khawh ko hnga nain kan naule fimcawn an ngaihnak le an thisa nih a hlamning zoh ah kan ral a kan thatter i zeithli canlai kan tih lem lo” tiah achim chap.

Hi konghe pehtlai in Siangngakchia nupa asi mi Sianginn Sang um Pi Mang Ci Iang nih ” Atu bantuk kan fale nih an naule fimcawn khawhnak lam an serpiak mi hna hi lunglawmh awk ngaingai asi, acheu kan fale cu tuition an kai i akai kho lo fanau tampi an um ve hna. Atu bantuk alak tein fimcawnnak an tuah mi hi a tha tuk i lawmhpi lo awk an tha lo an naule ca ah khuaruat kho mino tha an si upatnak ka pek hna. An mah tein anti khawh tawk thawh in an tuah mi asi ti ka theih cu ka lung atha ve hrimlo kan fanau thatnak ca tuah mi a si ko caah Siangngakchia nulepa hna zongnih kan ti khawh tawk cio bawmhchanh ve ah a tha,” tiah The Chinland Post ah a chim.

2020 March tiang sianginn kai le University kai a si nain COVID-19 pulrai ruangah sianginn khar cio a si. Kan mino hna fimcawnnak he an ihlat tuk lai tiah ruahchannak he hi ti bantuk in pumpek in cacawnnak an tuah hi a si tiah kan theih.

About The Author

Na ruahning rak langhter ve.. (Leave a comment)

%d bloggers like this: