Thinphannak He A Khat Mi Naypitaw
Salai Mangpau
Ralram a si rih lo nain Naypitaw cu himnak kong ah thinphannak he a khat cang caah cozah riantuannak zungkip, bawi rual, ralbawi pawl cu an umkalnak sang paoh ah thinphang in an umnak khualipi a si cang.
Naypitaw hi SAC le cozah rianṭuantu hna Headquarters pi a si bantuk in himnak security zong ṭha tein ṭuanvo an lak nak hmun a si.
1027 operation an thawk hnu ah mipi ralkap hna nih khuapi pakhat hnu pakhat an lak thluahmah, SAC nih an sakhan le penguknak pawl an kaltak,mipi dohthlennak bu nih “Lamkip in Naypitaw ah” tiah tlang an tar tik ah cozah zung kip riantuantu hna le khuachung um mi hna thinphang in an um.
January 24-25 tiang ah Naypitaw cu mipi ralkap nih an luhhnawh lai ti mi bia a leng i hngakchia sianginn an kai ter ngam hna lo, nu le pa cozah riantuantu hna zungkai ngam lo mi an tam ti a si.
SAC nih uknak a lak hnu ah ralkap bawi lian le hmunkip um ralbawi lian hna innchungkhar tam deuh cu Naypitaw ah an chiah hna. Naypitaw khuasa mi an run tam ngai.
Yangon, Ayeyarwaddy, Naypitaw telh lo in a dang ramkulh, ramthen hmun kip ah kahdohnak a um cang hnu cun Naypitaw he ramri a si mi Karenni le Bago ram tiang kahdohnak a fak cang.
Naypitaw cozah zungkip, bazaar, rawldawr, hlasaknak le puai tuah tawnnak hmun kip ah kahdohnak meithal, bom puah thawng a um rih lo nain hlan bantuk in hmun nuam a si ti lo.
“Lamkip in Naypitaw ah” timi raldoh operation pi cu NUG Defence Minister U Ye Mon nih thawngthanhnak a tuah hnu cun Naypitaw pawngkam ah kahdohnak a um colh. Ralhrang Headquarters, Naypitaw cu atu bantuk in mipi ralkap lei nih timh ciamman tein kahdohnak ah region command bu zong dirh a hun si. Battalion 801 in 806 tiang battalion 6, Pahkaphah bu, Tantaung chaklei special bu le tangrual phu hna nih an kah hna.
Naypitaw nitlak lei Myotit, Natmouk, Taungdwingyi, Chaklei Tatkon, Yametin, nichuak le Pyinmana, Pinlaung, thlanglei Yedashe lei in mipi ralkap hna cu ralkap battalion bu hruaining phunglam tein command tha tein ral an do. Cucaah Naypitaw peng ah bom puahnak, kahdohnak, sakhaan laknak, Naypitaw ralkap vanlawng tual kahnak an tuah khawh. Ralhrang lei nih an Headquaters he naihniam hmun ah ralkap thazang an hun chap thluahmah ve. Naypitaw peng hmanh ah humhimnak an la kho ti lo.
Naypitaw chung um battalion hna hriamngan hmannak caah fund hmunkip ah an kawl cang. Mipi ralkap lei nih hriamngan cu chim lo hriamhme meithal in an kah mi hmanh an celh ti lo, harnak an tong ngai cang. Mipi ralkap nih an herh mi kuan/zen hriamnam dongcat lo tein thazang an ngeih khawh peng ahcun ralhrang sakhan pawl pakhat hnu pakhat an lak khawh thluahmah ko lai.
Mifir Le Damiah An Karh
Naypitaw ah kahdohnak meithal thawng a um rih lo nain himnak a um kho ti lo, mifir le damiah an karh ngai cang. Khuachung um sang kip ah mifir an tam. Tangka a har, ei awk um lo mi hna an tam, thilfir le damiah phun in mithil an lak. Motor cycle tiang an fir ngai cang. Palek sakhaan ah report an pek zong ah thilfir case cu thilhme te ah an ruah cang caah palek zong nih zei an rel ti lo. Palek sakhaan kip himnak caah an sakhaan cu thirhling in an kulh dih ngawt. Sakhan ah mipi umkal ngam tuk ding a si ti lo.
Khuapau dohthlennak ahcun Myanmar ram ah ral a tho bal lo mi Myanmar hmunlai bik khua hna nih atu cu Naypitaw peng chung ah mipi ralkap le tangrual phu hna nih hnahnawhnak pek in umthiam loin an kah cang hna. Mipi ralkap hriamngan hmang kho dirhmun a hun phanh tik cun SAC North-Western command umnak Monywa ah kahdohnak a um peng bantuk in Naypitaw peng zong ah kahdohnak a hun um lengmang cang mi le Naypitaw khuachung mipi sining le ralkap um tu ning zohtik ah thinphan dai lo in an khat ko cang.
Cherhchan: Myanmar Now, Photo
About The Author
