Tlangcung Hriamtlai Phu Hnih NMPS Le LDU Nih NCA Minthut Ding In Cathanh An Chuah
Chinland Post| 2018 January 23| Tlangcung hriamtlai phu hnih a simi New Mon State Party (NMSP) le Lahu Democratic Union (LDU) cu ram pumpi huap kahngol (NCA_ national cease-fire agreement) hnatlaknak biahren cu a rauh hlan ah min an thut lai tiah January 23 ah thawng an thanh.
Phu hnih fonh cathanh an chuahmi ah rampi ruahnak petu Daw Aung San Suu Kyi, runvennak bawizik general Min Aung Hlaing he January 23, Naypyidaw ah tonbiaruahnak an ngei i NCA minthunak le remdaihnak rian kong kan i ceih tiah an langhter.
“NCA biahren minthutnak kong le remdaihnak lamthluan kong naihniamte in an i ceih. New Mon State Party (NMSP) le Lahu Democratic Union (LDU) cu a rauh hlan ah NCA biahren minthutnak an ngei lai tiah cathanh an chuahmi ah aa tel.
NMPS haotu Naing Thaw Mon le LDU haotu Jar Khun Sa hruaimi palai phu cu January 23 zingka, Naypyidaw ah Daw Aung San Suu Kyi le general Min Aung Hlaing he a dangte in biaruahnak an ngei i NCA minthutnak kong an i ceih.
Cuti an i tonnak he pehtlai in rampi ruahnak petu zung in chimnak nawlngeitu U Zaw Htay nih, “Hi hriamtlai phu hnih nih zingka ah runvennak lutlai zik an ton. Cun, rampi ruahnak petu he an i tong than. An tonnak ah minthutnak kong le thut dih in tuahdingmi kongkau an ceih. Cuti an i ceihmainak cu kaphnih lunghmuihnak an ngei veve. Hruaitu upa hna zong nih an i ton dih cangka NCA minthut ding timi cathanh an chuah colh tinak a si” tiah a fianter.
NCA hnatlaknak biahren cu tlangcung hriamtlai phu 8 nih an thut cang i atu kumzabu 21 panglong conference avoi 3nak tuah hlan ah tlangcung hriamtlai phu hnih an i chap lai tinak a si. NMSP le LDU nih zeitik dah NCA min kan thut lai timi nicaan cu fiangte in an thanh rih lo.
Tu thla dongh ah tuahtimhmi kumzabu 21 panglong conference avoi 3nak a simi ramkomh remdaihnak conference pi cu February thla ah tuahding in a nicaan an thawn than.
Ref: DVB Burmese
About The Author
