Tlangcung Miphun Zung Nih Chinram Peng(9) Caholh le Nunphung Training Caah Kyat Sing (900) A Pek Hna
Salai Bawi Lian Sang|TCP-Kalay| September 14, 2020| Tlangcung Miphun Zung tawlrelnak in Chin ramkulh chung pengkhat ah kyat sing 100 cio an bawmh hna tiah kan theih.
“Hakha peng caah CACC nih tuanvo lak in August thla thok in September zarhkhat tiang CACC hall, Hakha thar, Bungzung, Surkhua peng cheukhat le Gangaw peng ah khuakhat ah ni 4 chung traning kan pek hna” tiah Pastor Lai Cung (Literature committee Secretary CACC ) nih The Chinland Post ah a chim.
“Gangaw, CACC hall le Hakha thar ah Teaching Assistance (TA) saya/mah minung(30) hna cawnpiaknak kan ngei. Surkhua peng le Bungzung ah Mino Laica nunphung kong cawnpiaknak kan ngei kho. Cawnpiak tu ah Pastor Lai Cung(CACC), Rev.Dr Khar Ling(CACC), Sayakyi L. Tlung Pum le Saya Tin Peng Mang (Hakha ca holh Secretary) hna an si “tiah Pastor Lai Cung nih a chim chih.
Tlangcung Miphun Zung (Minister of Ethnic Affair) zung cu 2015 sermi upadi ningin 2018 hnu in Hakha ah zung pakhat an ngei i Chin ramkulh chung pengtlang holh phun (27) Cozah cawnnak nawl pekmi an tawlrel cuahmah lio a si.