June 20, 2024

Tonzang Khua Lak Kahdohnak Ah SAC Lei 40 Leng An Tlaih Hna, Hriam 100 Leng An Lak Khawh

0

The Chinland Post | 2024 May 24 — Chin ramkulh, Tonzang khua lak kahdohnak ah SAC lei 40 leng a nung in an tlaih hna i Rifle 100 hrawng an lak khawh tiah Salat Htet Ni nih a chim.

Tonzang khua lak kahdohnak, a ni 9 nak May 23 zaanlei sml 4:30pm hrawng ah SAC ralkap pawl le ZRA hna cu Tonzang khua in an kir dih cang i Tonzang khua ah SAC ralkap an thiang cang tiah Salat Htet Ni nih a fehter.

“Nizaan May 23 zaanlei sml 4:30pm hrawng in SAC ralkap pawl cu Tonzang khua ah an um ti lo. Atu cu Tonzang khua hi SAC ralkap an thiannak hmunhma a si cang” tiah CNF/CNA chimphuannak nawl a ngeitu Salat Htet Ni nih a chim.

Tonzang khua an sungh nakhnga lo vanlawng in bawmhnak a rak thlah mi SAC ralkap 100 leng zong Tedim khua ah an kir dih cang tiah theih a si.

SAC ralkap le ZRA (EC) chungtel minung 40 hrawng an tlaih hna, cu chung ah ZRA (EC) lei bawi ngan pakhat aa tel tiah kan theih i kan fianh kho rih lo tiah a chim.

An tlaih mi minung 40 chung ah 15 hi aa hliam mi an si caah an thlop hna tiah theih a si.

Tonzang khua lak kahdohnak a hramthawk lei ah hriam 50 hrawng an lak khawh i a hnu ah hriam 40 leng an lak khawh chap tiah theih a si.

Tonzang khua Operation hi Chinland cozah, Defense Ministry nih a voikhatnak bik a tuah mi Operation a si i May 15 ah SAC ralkap sakhaan pawl an kah hmasa i May 19 cun Cikha khua an lak hnu ah May 21 ah Tonzang khua ralkap sakhaan zapi an lak khawh dih.

Sakhaan a zaamtak mi SAC ralkap pawl cu Tonzang khuachung le a pawngkam hna ah an i samh i van lei in bawmhnak a pek hna leng ah van lei kahdohnak zong fak taktak in a tuah.

Cucaah kahdohnak pehzulh in a rak fak i Chin dothlennak phu pawl nih an kulh hna i an kah caah May 23 ahcun an kir dih hi a si.

“Khuachung an i thuhnak a pawngkam ah bomrap pawl an hmanhtak caah hmunhma zohfelnak tampi tuah rih a herh” tiah Salai Htet Ni nih a chim.

Tonzang khua operation chung ah Chinland Defense Ministry tang um Chin hriamtlai phu pawl leng ah CDF-Asho le Y-PDF hna tiah phu 14 an i tel.

Kahdohnak pawl chung in May 22 ah SAC ralkap pawl sin in tangka sing 5,000 hrawng an lak khawh i a himnak hmun ah an fim tiah theih a si.

“Ting thong 3 an ti mi hi SAC ralkap nih an sakhaan an zaamtak caah an i dornak cyclone centre, i dornak inn (ရိပ်သာ) hna in an lak mi a si. Tonzang khua an zaamtak lai ah bank tangka an ṭhen i an chiah mi a si men lai. Ṭha tein kan rel rih lo. Ting thong 3 leng a si. Ting thong 4/5 a phan kho. Ting thong 3 tiang an rel khawh” tiah Salai Htet Ni nih cun a chim.

Cun Tonzang khua ah CDM a tuah mi siangcachim telh in ramkhel thongtla minung 3 zong May 22 ah palek sakhaan in cyclone center ah an ṭhial hna lio ah Chin dothlennak phu pawl nih an khamh khawh hna.

Cu chung ah CNF/CNA rianṭuan zong a tel i atu cu himnak hmun an phan cang tiah theih a si.

CDM sayamah hi Primary siangcachim a si i nun chung thongtla ding in bia an khiah mi a si i a pa hi thong kum 7 tla ding in bia an khiah mi a si, Phaitu khuami pakhat zong Article 505-A in an tlaih ve.

Kahdohnak ruang ah cozah inn pawl, mipi inn tampi a rawk tiah theih a si.

Tonzang khuachung le khuate 15 in khuami 10,000 hrawng cu innlo zaamtak in ramlak ah an zaam hna caah cheukhat cu an ngandam lo tiah theih a si.

Ralzaam hna cu ruah khamnak, eidin, sii le thilpuan hna lakhruak in an herh hringhran tiah theih a si.

Tonzang peng hi India, Mizoram le Manipur hna he aa peh i Sagaing ramṭhen, Tamu peng he zong aa tlai.

Tlangsang a tamnak Tonzang peng ah khuachung mipi hi 7,300 leng le khuate ah minung 286,600 leng an um tiah 2019 ah Tozang GAD zung cazin ning in theih a si.

About The Author

Na ruahning rak langhter ve.. (Leave a comment)