May 21, 2024

Triennial Meeting An Lim; CACC General Secretary Rev. Dr. Lal Uk Cu Rev. Dr. Za That Nih A Chan Cang

0

City Hunter | 2018 April 2| March 29-April 1 tiang Hakha peng, Nabual khua ah tuahmi CACC (Chin Association for Christian Communication) Triennial meeting ah CACC hruaitu lutlai thimnak an ngei i atu lio TABC (Thantlang Association Baptist Churches) GS a tuan liomi Rev. Dr. Za That cu CACC General Secretary ah an thim tiah kan theih.

“Tutan kan meeting cu kumthum dan ah tuahmi avoi 10nak CACC Triennial_ delegate meeting a si. Tutan hi hruaitu thar thim caan a si caah tlamtlingte in thimnak kan ngei kho. CACC i thithruainak ah nawlngeihnak a sang bikmi cu GS hi a si. Hruaitu thar thimmi hna cu; GS ah Rev. Dr. Za That, AGS ah Rev. Paw Luh, Literature and Publication Department Sectary ah Pastor Lai Cung, Art and Cultural Department Secretary ah Rev. Dr. Khar Ling, CSSBD kha Education and Development Department tiah kan thlen i Secretary cu Pastor Ram Nawn a si. Cun a dang OC ah Chairman cu Rev. Joel Nawl Cung Lian, Vice ah Rev. Cung Hup, Treasurer ah Sayagyi L. Tluang Pum, Assistant Treasurer ah Rev. Dr Za Khar an si” tiah CACC Caholh Lei Riantuannak Secretary a simi Pastor Lai Cung nih The Chinland Post ah a chim.

CACC GS ah thim tharmi Rev. Dr. Za That

Tutan thimnak ah aa thlengmi cu GS rian le Vice Chairman rian lawng hi an si, a dang paoh cu a hlun rinh dih an si. GS hlun cu Rev. Dr. Lal Uk a si i Vice Chairman hlun cu Rev. Peter Peng Thang an si tiah kan theih. CACC cu GS nawlngeihnak in aa thihruaimi an si. Cu bantuk in CACC GS hlun Rev. Dr. Lal Uk cu Rev. Dr. Za That nih 2018 April 1 thawk in a rian a chan cang lai tiah kan theih.

“Tutan CACC delegate (triennial) meeting ah CACC ramchung Association kip nih zatuak 2% thawhva an pek tawnmi kha TABC nih 1.5% ah thumh ding in biatung an chuahpi. Ceihmainak kan ngeih hnu ah Association kip nih CACC caah thawhvo pek tawnmi zatuak 2% kha zatuak 1.5% in kan thumh. CACC ramchung ahhin ramchung ramleng in Association 16 hrawng le Khrihfabu in 350-400 kar hrawng kan i tel cang” tiah Pastor Lai Cung nih a biapeh ah a chimchih.

CACC GS hlun Rev. Dr. Lal Uk

CACC nih Laica textbook level 1 in level 12 tiang chuah ciami kha tharchuah than ding in biakhiahnak an tuah. Triennial meeting cu hi hnu kumthum lawng hnu ah an tuah than te lai. Cun, CACC BM meeting cu 2019, Gangaw peng, Auh Hlah khua ah tuahding in biakhiahnak an tuahchih tiah tuanvo ngeitu upa sin in kan theih.

Tutan hi CACC Triennial meeting lawng si lo in Nabual khua Khrihfa kum 100 tlin camtuak zong an tuah chih. Khual a phan khomi hi CACC delegate in minung 150 le inntek khuami khual hi 300 hrawng an si ve caah khual zapi hi 450 hrawng an si lai tiah ruahdamh a si.

Photo Credit: Vanlal Rammawi (CACC)

About The Author

Na ruahning rak langhter ve.. (Leave a comment)

%d bloggers like this: