Tukum Hakha Chin Miphun Ni Zuamcawh Paih Champion Laksawng Cu Taisawm Le Ks. 500,000 Pek A Si Lai

City Hunter| 2018 January 25| Avoi 70nak Chin Miphun Ni, Hakha, Vuan Tu Maung certual ah tuah dingmi paih zuamnak ah laksawng phun 7 pek ding paih committee phu nih an timh. Cu lakah zuamcawh paih champion laksawng cu champion taisawm le ks. 500,000 pek a si lai tiah kan theih.

Hi kong he pehtlai in Paih Committee haotu Pu Chum Ling nih The Chinland Post ah atu bantuk in a chim.

“Tutum paih zuamnak caah laksawng phun 7 pek kan timh. 1). Zatlang paih bualcotu laksawng hi ks. 300,000 le taisawm, 2). A phuphu (group) paih pakhatnak laksawng hi ks. 300,000, 3). A phuphu paih pahnihnak laksawng hi ks. 150,000, 4). Paih aa dawh bik laksawng hi ks. 100,000, 5). A tam bik a teng khotu laksawng hi ks. 100,000, 6). Zuamcawh (singkhaw) paih champion laksawng hi champion taisawm le ks. 500,000 le 7). Zuamcawh paih pahnihnak laksawng hi ks. 300,000 pek an si lai.”

“Tukum paih tawlreltu phu nih chawva a zapi hman an timhmi hi ks. sing 30 (3,000,000) a si. Hi chung ah cozah lei nih zeitluk dik an kan chuahpiak khawh te hnga. Aa paimi thilthuam, rikhiaktu le paih tlangtlatu phu thilthuam caah ks. 550,000 hrawng in kan tuak. Cun, Sound system ca le a dangdang a herhmi caah ks. 400,000 hrawng dih ding in kan tuak. Paih a tlamtlin khawhnak ding ah mi dangdang zong nih chawva in bawmhchanh le laksawng tete pekpiak khawh kan si” tiah a biapeh ah a chimchap.

Zuamcawh paih hi tukum cu minung 24 lawng cohlan an si cang lai. Cu bantuk in a phuphu (group) paih zong hi minung 7 si ti lo in minung 5 lawng in cohlan a si ve cang lai tiah tuanvo ngeitu upa sin in kan theih. +++

Leave a Commnet

%d bloggers like this: