Tuluk Ram BRI Meeting Ah Min Aung Hlaing Aa Tel Kho Lo
The Chinlandpost | October 18, 2023 — October 17 ah tuah mi Tuluk ram a voi 3nak Belt and Road Initiative-BRI meeting ah ASEAN ram hruaitu hna an i tel nan SAC lubik Min Aung Hlaing aa tel lo.
Vawlei cung ramkip nih theihhngalh hnathlakpi mi hruaitu si a duh ngai mi SAC hruaitu nih Tuluk cozah nih a tu meeting ah sawm ding in aa hngahhlang ko lai nain 2021 ah Min Aung Hlaing hruai mi SAC phu nih uknak an lak hnu in Tuluk ram tlawnnak a ngei rih lo.
BRI project kum 10 tlinnak, Tuluk ram President Xi Jinping hruai mi meeting ah Russia ram President Pu Tin le vawlei ram hruaitu cheukhat hna le ASEAN ram in Indonesia, Cambodia, Laos, le Thailand ram hruaitu hna an i tel.
Israel le Palestine ram buainak kong vawlei cung ramkip thinlung a cam lio ah Tuluk nih mah BRI ah ram 130 in palai pawl meeting an kai ding a sawm hna hi a si.
Tuluk ram khuapi Beijing khua ah nihnih chung tuah ding mi BRI meeting ah SAC palai chung in Lam le Sul Minister General Mya Tun Oo meeting a kai lai tiah Myanmar ram lei nih thawngthanhnak an tuah.
Tuluk, East Asia ram, Africa ram, Nitlak ram hna ah tlanglam, tilam pehtlainak in chawleh khonak ding ah a tu Belt road –Pu Lam project pi meeting ah SAC lubik tel ding in Tuluk nih a sawm le sawm lo hi bia fiang theih a si lo.
Russia he hawikomhnak tha a ser cuahmah lio ah Russia President cu Vawlei cung hruaitu tiah Min Aung Hlaing nih a chim mi kong ah Tuluk hruaitu a lungtling tuk lo tiah Yangon um Tuluk ram palai nih a chim tiah Myanmar Now News nih a rak langhter.
About The Author
