Unau Hawikom Phu 3 Le Ralkap Council Karlak Kahdohnak A Dai Lai
The Chinland Post | 2024 January 12 — Chaklei unau hawikom phu 3 le ralkap council karlak ah kahdohnak daihter ding in hnatlaknak an ngei tiah The Irrawaddy nih a langhter.
Tuluk ram, Yunnan khua, Kunming khua ah unau hawikom phu 3 aiawhtu pawl le ralkap council aiawhtu pawl cu January 10 in tonnak an ngei i a voi 3 nak ah atu bantuk in hnatlaknak an ngeih hi a si tiah a langhter.
Unau hawikom phu 3 ralkap pawl le kawl ralkap hna cu an umnak hmun cio ah hmaifong ti lo in kadohnak daihter ding tiah hnatlaknak an ngei.
An hnatlaknak chung ah ralkap lei nih hriamngan le vanlawng kahdohnak a daihter lai i unau hawikom phu 3 zong nih sakhaan lak kahdohnak le khua lak kahdohnak pawl a tuah ti lai lo tiah an lungtling.
Ton biaruahnak ah ralkap lei in (NSPNC) chungtel in Lt. General Min Naing hruainak in an kai i MNDAA, TNLA, AA lei in Secretary pawl an kai.
Tuluk ram lei in Myanmar ram he pehtlai in palai Mr. Deng Xijun zong ton biaruahnak ah a kai.
Hnatlaknak ah kaphnih lei nih min an thut i kahdaihnak hi January 11 in aa thawk lai tiah theih a si.
Ton biaruahnak ah ramri thil phorhnak pawl awnpiak ding in hnatlaknak an ngei ko nain a tak kahdohnak a daih lawng ah ramri lam pawl awn ding in unau hawikom phu 3 telh in Tuluk palai le ralkap lei palai pawl nih an i ruah.
A voi 3 nak Ku-min ton biaruahnak he pehtlai in unau hawikom phu 3 nih cathanh an chuah te lai tiah The Irrawaddy Burmese thawngzamh nih a langhter.
About The Author
