Vanlawng, Helicopter le kahdohnak tinbaw he CDM nan tuah ahcun $ 500,000, Tank, khamnak mawṭaw he CDM nan tuah cun $ 100,000 laksawng kan in pek hna lai : NUG
The Chinland Post | 2022 April 8 – Vanlawng, Helicopter le kahdohnak tinbaw (Warship) he CDM nan tuah ahcun $ 500,00, Tank, khamnak mawṭaw (Armor) he CDM nan tuah ahcun $ 100,000 laksawng kan in pek hna lai tiah CDM caah laksawng peknak nawl cu NUG nih a chuah.
Tangka Laksawng peknak cu caan karlak President Duwa Lashi La nih April 7 thok in nawl a pek.
Vanlawng, Helicopter, kahdohnak tinbaw (Warship) he mipi sin nan i fonh a si ahcun USD $ 500,00 (Sing10,000), Vanlawng, Helicopter, thilphor vanlawng, kahdohnak tinbaw (Warship) pawl an i dinh lioah faak ngai in nan hrawh khawh hna a si ahcun pakhat ah USD $ 300,000 (Sing 6,000) laksawng kan in pek hna lai tiah cathanh ah an telh chih.
Kahdohding in a zuan lioah a rawkding in a tuah khomi cu pakhat ah USD $ 300,000 (Sing 6,000), aa tinhnak hmun tiang a phan ko nain mipi a kah hlan ah tlak hramhram ding in a tuah khomi cu USD $ 300,000 (Sing 6,000) laksawng pek nan si lai tiah a telh.
Cun, vanlawng, Helicopter, thilphor vanlawng, kahdohnak tinbaw (Warship) pawl faak taktak in a hrawk khomi cu pakhat ah USD $ 300,000 (Sing 6,000), vanlawng datsi pawl an chiahnak puahter, hrawh khawh a si ahcun 1 Pound ah USD $ 100,000 (Sing 2,000) laksawng pek a si lai.
Cun, tank, khamnak mawṭaw (Armor) pawl hman khawh lo tiang in hrawh khawh a si ahcun pakhat ah USD $ 100,000 (Sing 2,000) laksawng pek nan si lai tiah NUG nih a thanh.
Sualnak ngei lomi mipi pawl kahnak ah SAC nih an hmanmi seh thilrii pawl hi mipi tangka in cawkmi a si caah mah thilrii pawl hmang in mipi an dohmi ṭhanmi hi cohlan awk a ṭha lo tiah NUG nih a thanh.
Tangka laksawng pawl cazin tlamtling tein a langhter khomi phu a silole minung pakhat nih tinco khawh a si i laksawng cohlannak le mah bantuk thiltuahnak pawl cu The Puplic Property Protection Act-1947 ning in a ziizut le sualphawt a si lai lo tiah NUG nih a chim.