Vawlei Hmun Chuhmi Kong Ah Rampi Ruahnak Petu Zung In Deputy Minister Khin Maung Tin Hakha A Phan
City Hunter| 2018 March 21| Rampi Ruahnak Petu zung in Deputy Minister Khin Maung Tin le a riantuanti hawile hna cu Chinram vawlei hmun chuhmi kong dothlat le thil sining chimhfian he pehtlai in March 20 ah Hakha an phan tiah kan theih.
Hi kong he pehtlai in Chin ramkulh Social Affair Minister Pau Lun Min Thang nih atu bantuk in The Chinland Post ah a chim.
“Rampi Ruahnak Petu- Daw Aung San Suu Kyi zung in deputy minister Khin Maung Tin hruaimi phu hna cu March 20 ahkhan Hakha an rak phan. Chinram ah vawlei hmun chuhmi le vawlei hmun tawlrelning kong tibantuk chimhfian le zeidah a cang timi hlat le hngalh duh ah atu bantuk in Chinram an rak tlawn hi a si. Anmah hi ramkulh le ramthen dang zong ah nihnih khuallam in an tlawng cio dih. Chin ramkulh cozah bu telh in Falam pengkomh, Hakha pengkomh, Mindat pengkomh (district) zung upa vialte he ton biaruahnak an kan ngeih. Chinram ah vawlei hmun chuhmi a um maw? Zei bantuk pawl dah an si? Zeitindah nan tawlrelnak hna, zei dirhmun dah nan phak tibatuk khi hngalh an duhmi cu a si. Chinram cozah bu le pengkomh kip cio in tuanvo ngeitu hna nih an hmuhtonmi kha chimhfiannak an ngeih cio.”
“March 20 kha an phan i zahan kha Hakha ah an riak. Tuzan lei (March 21) hi Hakha in Chin ramkulh, Falam pengkomh Rih ah an kal i Rih in Kalay lei ah an kir beh te lai. Tutan ah Pyihtayzi zung in tuanvo ngeitu, ramkomh ministry zung in tuanvo ngeitu le ramkomh hluttaw palai pahnih telh in an zapi minung 9 an si” tiah a biapeh ah a chimchih.
Rampi Ruahnak petu zung in Deputy Minister Khin Maung Tin hi vawlei hmun chuhmi chekfeltu phu No.2 hruaitu lutlai a si. Chinram ahhin pupa ram kong le zeidang kongkau vawlei hmun kong ah buainak tete a um. Vawlei hmun kong hi Myanmar ramkomh Vice President Henry Van Thio tawlrelmi rian tang ah a ummi a si. Ramthen tampi i ralkap nih lothlotu (vawlei ngeitu) hmun chuhmi vialte kha Vice President Henry Van Thio nih ekah a thong renglo vawlei ngeitu le lothlotu hna sin ah a ap than len cang tiah kan theih.
Shanram ah ralkap nih vawlei hmun rak chuhmi ekah 600 renglo zong Vice President Henry Van Thio nih lothlotu hna kut ah a pek than hna.
About The Author
