Vok Tlangrai Tlaihhipnak Caah Vietnam Ah Vok Nuai 2 An Thah
The Chinland Post| 2019 June 4| Vietnam ah thih khawhnak tiang a phanmi Africa vok tlangrai zawtnak a cangmi tlaihhipnak (control) le i khamhnak caah vok nuai 2 kan thah tiah nawlngeitu cozah nih May 31 ah an thanh.
Vok tlangrai rang ngai in a karhmi hrawhnak le khamnak caah rampi i bawmh cio a herh tiah Vietnam cozah nih thanhnak an tuah. Vietnam ram hmun 63 lakah 48 ah vok tlangrai zawtnak a karh, a vaak tiah Cinthlaknak minister Nguyen Zuan Cuong nih hluttaw ah a chim.
Vietnam ah vok thahmi 1.7 nuai in zarhkhat tlin hlan ah nuai 2 tiang a phan. Milu nuai 96 a simi Vietnam ah sa an eimi cheuli ah cheuthum hi voksa a si. Sathahnak le cinthlaknak dum in vok nuai 30 lakah a tamdeuh cu Vietnam ramchung mi nih an ei.
“Hihi tih a nung taktakmi zawtnak pakhat a si. Kanmah biapi taktak ah chiah in kan doh lai. Hi dohnak ah ramkhel mibu zapi kan i tel dih ko lai. Ramchung ah voksa ei rih lo ding le thlaruk chung ah voksa a dih ding an i ruahchannak kong” Cinthlaknak minister nihcun a chim.
Vietnam ah voksa market hi anmah tangka in 94 trillion (US$ 4 billion) man hrawng a si i rampi cinthlaknak in zatuak 10% hrawng a si.
Asia ramchung a hmasa bik vok tlangrai zawtnak cu nikum August thla chung Tuluk ram ah an hmuh. Tuluk ram hi vawleicung voksa chuahsernak tambikmi ram a si i vok tlangrai ruang ah vok nuai 200 tiang an rak thah/ an thi. Ref: Duwun
About The Author
