Wah Hriamtlai Phu Chuahpimi Hi Kaphnih In Kan I Ceih Ko Lai; U Zaw Htay
Salai Aung Aung| 2018 July 15| Ram pumpi huap kahdaihnak ca hnatlakmi (NCA) chung tialmi hna hi remhnak nawl um dingin lungtlinnak a um lo ahcun ramkomh in chuahnak nawl kan in pek hna lai tiah cozah phu le tatmadaw (Ralkap) nih bia ca in biakamnak nan kan pek ahcun kahdaihnak minsen kan thut ve lai tiah Wah hriamtlaiphu nih an ti mi cu kan i ceih ko hna lai tiah cozah phu in chimrelnak nawl ngei upa pakhat nih a chim.
UWSA nih cozah phu le tatmadaw sinah an hal mi hi NCA chungah aa tel lomi a si tiah U Zaw Htay nih a chim.
NCA cahren chungah ramkomh in chuah khawh a simi ti zong aa tel lo i chuah khawh a si lo timi zong aa tel lo. NCA cahren pohmah 27 nak ah a ummi cu NCA chungah fiang tein langhter lomi thil dang a chuah ahcun cozah phu le hriamtlai phu kaphnih tha tein kan i ruahceih lai timi lawng a um” tiah cozah lei palai U Zaw Htay nih a chim.
State Counsellor Daw Aung San Suu Kyi le UWSA, KIA, SSPP/SSA hriamtlai phu lutlai pawl cu July 12 ah a dang tein ton biaruahnak an ngei. Wah nih cun NCA cahren hi remh khawh a si lo timi cu remdaihnak lamthluan ah hmai nor khawh nak ding ca dawnkhantu a si kho tiah an chim.
Wah hriamtlai phu nih NCA cahren hi remh awk tha in tuah ding an duh nak a ruang cu NCA cahren minsen a thu cang mi le tatmadaw karlak zongah tukdohnak a um peng rih mi le hi bantuk raltuknak daihter dingin tial mi hnatlaknak NCA i a um lo caah a si tiin an chim.
NCA cahren min a thu rih lomi Rakhine, Pa Long le Ko Kant hriamtlaipu pawl zong cozah nih anmah dang te cio in ton ding timhtuahnak an ngeihnak kong U Zaw Htay nih a chim.
Chaklei hriamtlaiphu timi pawl nih hriamnam kan chiah cang tiah thawngthanhnak an tuah hnu lawngah cozah le tatmadaw lei kap in ton biaruahnak kan tuah pi hna lai tiah an chimmi zong a rak um.
Avoi thumnak kumzabu 21 panglong conference ah a kaimi chaklei hriamtlai phu 7 in hruaitu hna cu July 15 ah Naypyidaw in anmah le an umnak cio ah an kir cang.
Ref: RFA
About The Author
