Yedashe kahdohnak ah SAC ralkap lei in a thi mi le hliam a tuar mi an tam
The Chinland Post | 2023 February 17 — Bago ramṭhen, Yedashe peng ah PDF phufonh pawl nih SAC ralkap bom an puah hnawh hna, meithal in an kah hna i SAC ralkap lei in a thi mi le hliam a tuar mi an tam tiah Daung Mintha nih February 16 ah a thanh.
February 14 zaanlei ah Yedashe peng, Dotan khua hlei ah a rak lut mi SAC ralkap pawl cu Daung Mintha le a unau phufonh nih bomrap an puah hnawh hna i Company 4 nih meithal in an rak kah chap hna tiah theih a si.
Cuka hmun kahdohnak ah SAC ralkap 13 nak tlawm lo an thi tiah Daung Mintha PDF nih an thanh.
Dotan khua ah hmunhma a khuar mi SAC ralkap nih hriamngan an kah caah Pinthila khua thlanglei ah a um mi minung 1 aa hliam tiah Yedashe Township Information nih a langhter.
Cun Yedashe in bawmh ding a ra mi SAC ralkap 70 hrawng Aungchiantha khua ah an lut i Dotan khua lei ah meithal an puah caah kum 4 hngakchia a hna ah a khen i a nunnak a liam tiah an langhter. Cun khuami pa pakhat zong an tlaih tiah theih a si.
Khuami hna an zaam dih caah Dotan thlanglei ah a um mi mipi inn pakhat ah tangka sing 8, Dotan khuanu sin in suiṭhi 2 le kutdonghrolh 1 an lakpiak hna. Zuu dawr pawl zong an hrawh cikcek hna i zuu pawl an din tiah an langhter.
