Zeitindah Inn A Kangh I Hakha Chawdawr Nih Zeidah An Tuah?
City Hunter| 2018 May 31| May 31 zan, deilei suimilam 2:00 hrawng i Hakha khuapi inn a kaangmi hi zeitindah a kanghning a si le hi innkangh ruangah Hakha chawdawr ngei pawl zeibantuk cawlcanghnak dah an ngeih na hngal ve cang maw?
May 31 zan, zinglei suimilam 2:00 hrawng, Hakha lamtonnak (laansone), Dawrthar sang ah inn pahnih le dawr pali a kaang i an ciam dih. Inn a kaanghnak hi Hakha Dawrthar sang, lamtonnak hmun, Bogyoke lampi cung ah a si. Inn a kaangmi cu A Han Nu te inn (Pale Store), Pi Ui Cer te inn le dawrkhaan te lawng sakmi inn pakhat an si. Inn a kaangmi chung ahhin dawrkhan pali aa tel. Pu Ni Cung inn (Lairam Canphio Dawr) zong vampang vialte mei nih a hrem, a kangh ve nain khuami le meithat motor nih an hmih manh than. Pu Sang Cung inn zong a hrem pah nain meithat motor nih an ven i an phelh manh than.
Zeitindah Mei Kangh Aa Thawk?
Hakha mei kanghnak kong he pehtlai in Hakha penguk palek zung in sakhaanhmu U Thein Zaw Oo nih The Chinland Post ah atu bantuk in a chim.
“Mei hi Pi Ui Cer (Ni Ceu nu) te inn in aa thawk. An inn rawlchuannak coka, meitil in aa thawk. Cu meitil cu aa hlum i atu bantuk in inn a kangh hi a si. Electric mei in a si lo. A ngaingai ti ahcun hihi daithlan bia a si. Inn a kangh hi innpa nih an rak hmuh hmasa.”
Pi Ui Cer te inn hi Hakha, Dawrthar sang, Bogyoke lamthlang ah a si. Anmah inn in kehlei kam (chaklei) ah A Han nu (Pale store) te inn hi a si. Pi Ui Cer te inn he aa pehmi dawrkhan inn pakhat zong a kaang chih. Pi Ui Cer te inn ahhin sii-dawr pakhat pakhat he dawr hnih a um.
Mei Kangh Ruang Ah Ahodah A Thi?
Hi mei kangh ruang ah nu pathum an thi. Mei an hmih dih hnu kaangdap lakah an ruak in an char hna. Pi Ui Cer te inn ah a ummi Pi Ui Cer (kum 87) le a fanu Van Bawi Zi (kum 49)an thi. Cun, Pale store dawrtuahnak inn ah a ummi Pi Hliu Ngo (A Han Nu) a thi. Pi Ui Cer le Van Bawi Zi hi anmah an inn hmun mei a ciamhnak zawn ah an ruak an hmuh hna bantuk in Pi Hliu Ngo zong anmah an innchung ah an char ve. An ruak an hmuh hna caan hi zingka suimilam 6:00-7:00 kar hrawng ah an si. Mei nih a kanghpi chih hna ruang ah atu bantuk in an thihnak hi a si.
Mei Kangh Ruang Ah Ahodah Aa Hliam?
Mei kangh ruang ah Pale Store dawr ngeitu a simi Pi Khin Lay Sui (kum 45) cu a kut pahnih le a hmai aa hliam caah Hakha sii-inn ah an kalpi. A hma hi tihnung tuk cu a si lo tiah chungkhar naihniam upa sin in kan theih.
Zeitindah Mei An Hmih?
Mei a kaangmi cu khua a dei hnu ceu lawng ah an hmih khawh. Mei hi a kangh ka in meithat motor an ra ko nain a kanghning a fah tuk caah an hmit kho zokzok lo. Inn a kaangmi mei hmihnak caah motor 10, meithat zung riantuantu 55 le a bawmtu 15, Hakha Rungtlang ralkap 30 le khuami zapi nih ti gallon 120,000 tluk an hman hnu ah mei cu an hmih khawh. A inn a kaang cuahmahmi le a hlio i a hlio thluahmahmi meikaang tu cu suimilam 4:00am tluk ceo lawng ah an hmih khawh. Asinain, mei a kaanghmi le meici le meitil pawl a mih dih taktak cu zing khuadei hnu pi lawng ah a si.
Zeizat Man Dah Sunghzatlak An Ton?
Innkangh a tuarmi hna chungkhar nih innkangh ruang i sunghzatlaknak an tonmi zapi hi ks. 28,077,000 man a si tiah cozah lei nih an tuakpiak hna.
“Inn pahnih a kaangmi le dawrkhan pali nih an thilri man an sunghmi zapi hi a tlawm bik in ks. sing 10,000 man paoh cu a si lai. Hakha le Thantlang mizapi a kan cawmtu dawr cu Pale store hi an si. An dawrkhan chung chiahmi thilri le kodawng chung ah an chiahmi thilri vialte lawng hmanh ah hin ks. sing 7,000 man paoh cu a tling hrimhrim lai. Zar Zar siidawr i sii man vialte zong khi a tlawmte hrimhrim lo. Cu pin ah Pu Ni Cung le Pu Sang Cung inn a hremmi le a rawkmi zong an um rih fawn. Pale store dawr le inn a kangh cu Hakha le Thantlang mizapi sunghzatlak taktak a si. Thilri cu aa rel deuh rih, minung pathum tiang kan thihmi hrimhrim hi a man in tuak khawh lomi a fak bikmi le a ngan bikmi sunghzatlak a si” tiah min langhter a duh lomi Hakha chawdawr tuahtu upa pakhat nih The Chinland Post ah a chim.
Ahodah Palek Nih Ahmuh An Tuah?
Hi kong he pehtlai in Hakha penguk palek zung in sakhaanhmu U Thein Zaw Oo nih The Chinland Post ah atu bantuk in a chim.
“Innkangh he pehtlai in innkangh hram aa thawknak inn ngeitu Pi Ui Cer (Ni Ceu nu) kha Hakha palek sakhaan nih sualnak No. (ပ) (၂၁၆/၂၀၁၈) Yaza-tat-gyi (၂၈၅/၃၀၄-က /၃၃၇) in ahmuh kan tuah. Amah cu a thi cang nain inn ngeitu a si caah ahmuh kan tuahnak hi a si. Sihmanhsehlaw thinphang tuk ding cu a si lo, a thih cang caah a thi tiin ahmuh zong phih colh a si ko lai.”
Hakha Chawdawr Nih Zeidah An Tuah?
Inn a kaangmi ruang le Hakha chawdawr pali a kangmi ruang ah Hakha chawdawr tuahtu tampi nih an ngaihchiatnak langhternak ca le ngaihchiat, thihloh le sunghzatlaknak a tuarmi chungkhar hna hnemhnak caah an chawdawr vialte an khar cio dih hna. A bik in Hakha lamtonnak hrawnghrang i a ummi Bogyoke lam siseh, Matupi lam siseh, Pyidawtha sang lei le Dawrthar sang lei paoh nih an chawdawr vialte an khar cio dih. Cuti chawdawr an khar ciomi nihcun mizapi thinlung a thangh ngaingai. Mipi tampi nih an thangthat hna.
2018 Ah Ahote Inn Dah A Kaang?
March 25 (Sunday) chun suimilam 2:40 hrawng ah Hakha, Pyidawtha sang, Bogyoke lampi – Lunghleiva kam te ah a ummi le Hakha lamtonnak (laansone) chak te ah a ummi Pu Khar Nawn inn a kaang. Pu Khar Nawn inn hi dawrkhaan telh chih in dotli a si. Inn a kanghnak hi a dothnihnak in aa thawk. Vanchiat lei vanthat ah inn a kangh dih taktak manh hlan ah khuami le meithat motor nih an phelh manh than. Cuti a kang cu rawlchuannak coka ah electric mei a sawt ruang ah a si.
April 2 chun suimilam 2:00 tluk ah Hakha, Dawrthar sang, Shalom Guest House pawng ah a ummi Pi Mang Tin Ci te inn a kaang. Inn a kangh lio ah innchung ah a zengmi Pu Len Kham a um nain mei nih a hliam manh hlan ah an chuah manh. Inn hi tlakrawh inn dothnih a si i inncung in mei a tho. Inncung innpi ah mobile phone battery an tun (charge) mi in electric mei a sawt i inn a kanghnak cu a si.
April 23 zanlei suimilam 5:35 hrawng, Hakha khuathar sang, CB Bank zungthen pawng ah Pu Van Hup inn a kaang. An tappi mei in kangh aa thawk i an coka a kangh taktak manh hlan ah innpa chakthlang nih an hmih khawh colh.
April 16 zanlei India le Myanmar pehtlaihnak ramri a simi Falam peng, Rihkhawdar Myo No.2 sang ah inn 8 a kaang. Hiti mei a kangh ruang ah innchungkhar 6 in minung 48 caankarlak chung umnak inn ngeilo in harnak an tong. Tukum tanghra a phimi ngaknu Mai Ngun Siang Sin cu mei nih faktuk in a kangh. Rihkhawdar taihne sii-inn i an thlop hnu ah Kalay ah an kalpi i Kalay- Royal City sii-inn in April 24 ah a nunnak a liam. Hi inn a kanghnak aruang cu Pu Ngun Hlei Thawng inn a simi dawrkhaan ah an zuarmi gas a pem i a puakmi ruang ah a si.
About The Author
