Ziknawh Eihmurnak Kong Ah NLD Acozah Biakam le An Tuah Taktak Mi
The Chinland Post| 2018 July 6| NLD acozah cungah lungtlin lonak kong kan tialnak thawng in hin NLD nih an policy an thleng lai timi ruahchannak cu kan ngei ngam lo. Asinain, NLD kha acozah a tuantertu mizapi nih, kan sermi acozah nih hin an kan hleng maw? An kan kamh bang an tuah maw timi theihhngalhnak tlawmpal te tal a bawmchan hnga maw ti ruahchannak tu a si deuh.
2018 March thla ah khan Ramkomh Myanmar President thar U Win Myint cu a kai. President sinak in a kai hnu in tuah dingmi rian ah rammi a kamhmi hna lakah ziknawh eihmuarnak hi hrawh ding timi aa tel. Nikum NLD cozah an kai kate zong ah Daw Aung San Suu Kyi nih rammi tampi hmai ah hmaihngal ngai in a chimmi cu NLD chan ahcun ziknawh eihmuarnak hi kan doh lai tiah rammi cu bia a kamh hna.
Naite ah Union Finance minister, U Kyaw Win cu eihmurnak kong ah Anti- Corruption Commission nih a hnu zulh le dawi a hung si. Cu tikah NLD acozah a uar ngaimi rammi nih U Kyaw Win cu eihmurnak kong ah a sualnak hmuh taktak a si ahcun, a fakbik mi dantatnak an pek lai tiah hngah hlang cio a hung si.
Asinain, ruah lo pi in, President Office nih U Kyaw Win cu a rian in dinhnak nawl pek a si cang tiah a hun thanh ai. Cu lawng si loin, naite ah eihmurnak lei in a min a thang ngaimi Chin Minister pakhat cu a rian in dinhnak nawl pek a si cang ti men in dinhter a hung si.
Sihmanhsehlaw, NLD acozah cungah zumhnak a ngeitu rammi nih hin, hi bantuk in rian dinhter menmen khi duhmi le ruahchanmi cu a si lo. Rammi ruahchannak cu, eihmurnak lei in an sualnak hmuh a simi hruaitu paoh cu zaangfahnak um loin Ramkomh phunghram ning in a fakbik dantatnak pek kha kha orh ciomi cu a si. Anti- Corruption phung ning in cun U Kyaw Win hi kum 15 thong thlak ding a si. Nain atu tiang ahcun Anti-Corruption Commission zong nih U Kyaw Win hi a sual le sual lo an phuang duh rih lo.
2016 lio ah Daw Aung San Suu Kyi nih a Minister pawl, U Kyaw Win telh in, ralrinnak a pekmi hna cu, “zeibantuk ziknawhnak le eihmuarnak hmanh nan tuah lai lo, nan tuah a si ahcun thonginn ah nan kal ko lai, i thonginn chungah kaan veh hna nan hau lai” tiah a rak timi cu a lingtalet si cang ko rua.
NLD acozah nih hin eihmuarnak kong ah a biakam tlinter nakin eihmuar a hmangmi a minister pawl kha an hmaiphiah riangmang in an thutdanh kaltakter men in lam a kawl mi a hun lo cang. Hihi rammi nih kan i ruahchanmi a si lo. Kan i ruahchanmi cu a sualmi Minister kha phung ning tein dantat tu kha a si deuh.
Hi bantuk a sualmi hruaitu pawl zaangfahnak nih hin ram hruaitu nunzia a hrawh khawh hlei ah rammi zumhnak zong a zorter khawh. Kum hnih chungah zeipi pa thlennak a tuah khawh lo tikah, 2015 NLD minthannak cu khua tuaktaan kho rammi thinlung ah a zor ngaingai. A ralaimi thimnak 2020 ahcun ahodah a kai te lai timi cu caan lawng nih bia a chim te lai.
Catialtu:
Salai Lian Thawng Hnin
Hakha, Chin State
Biakilh: Hi cabia cu The Chinland Post hmuhning, ruahning le lungput a si lo, catialtu pumpak hmuhning a si.
About The Author
