2012-13 Kum Ah Mark 516 A Hmumi Leeng Ngun Tin Cuai He Biaruahnak
TCP Vol.1, No.23: | 2013 July 23| Leeng Ngun Tin Cuai hi 2012-2013 cacawn kum ah mark 516 in tanghra a rak awngmi a si. 2013 kum lio i The Chinland Post nih biaruahnak kan rak tuahmi kha careltu le tanghra a kai liomi siangngakchia hna caah siaherhank he zapi rel khawh ding in kan rak tar than.
Min : Ngun Tin Cuai
Chuahnak : Hakha
Umnak : Electric Sang, Hakha
Nu le Pa min : Pu Duh Cin le Sayamah Za Thluai
Huammi : Carel
Chuah kum : 31 March 1997
TCP: Tukum cacawn kum ah 4D in Mark tampi a hmuh tiah kan theih i biaruahnak caan na kan pe kho hnga maw?
NTC: Si, kan pek khawh ko hna lai.
TCP: Sianginn na kai kum thawkka in D zeizat hmuh dah naa tinh?
NTC: Ka lungthlite in 6D hmu ding cu kaa tim. Myanmar le English hi ka hmu kho te hnga maw ti ka ruat pah. Mah belte cu 6D nak in mark tampi hmuh ding hi kaa tinh deuhmi a si.
TCP: A hmasa bik ah 4D le na mark hmuhmi theih kan duh ko?
NTC: 4D (Distinction) ka hmuhmi subject le mark cu; Mathematics ah 92, Chemistry- 96, Biology- 87 le Physics- 97, Myanmar– 71, English– 73 a dih lak fonh ah 516 a si.
TCP: Tangcheu in tanghra tiang khua zei ah dah na kai?
NTC: No (I) BEHS, Hakha ah ka kai i tanghra tu cu Pyin Oo Lwn, Soesan private sianginn ah ka kai i a kum khatnak ah ka awng.
TCP: Soesan boarder ah Chinmi pa zeizat dah nan kai?
NTC: Pa nga kan um i pa thum kan awng.
TCP: Boarder fee zeizat dah a si?
NTC: Sing 20 a si i an ka dawt caah 17 lawng an ka lak.
TCP: Ni khat ah suimilam zei zat dah caan pek in ca na zoh khawh?
NTC: Suimilam 5 chung caan hmante in ka zoh.
TCP: Zei ruang ah dah thiamhlei pali (4D) hi ka hmuh tiah na ruah?
NTC: Pathian thawng in a si ko. Cun ka nu le ka pa nih thazaang peknak thawng le tangcheu in tangkua tiang ca a ka chimmi saya/mah thawng zong in an si.
TCP: Naa tinhmi na kan chim kho hnga ma?
NTC: Ram le miphun nih a herhmi Siibawi tha si hi kaa tinhmi le ka duhmi a si.
TCP: Ca cawn lio ah tlangval ngeih hi a tha tiah na ruat maw?
NTC: Ca cawn lio ah duhmi ngeih cu ca thiam lonak a si. A ruang cu ca lei ah kan lungthin a um ti lo.
TCP: Tanghra a cawng liomi sin ah biacah na duhmi?
NTC: A hmasa bik ah thlacamnak in ca zoh hmasa ding. Cun ni khat cawnmi nikhat ah thiam khawh i zuam ding.
TCP: Caantha na kan pek i tlamtlingte in bia na kan leh lawng si lo in mark sangpi na kan hmuhpiak caah kan i lawm tuk. Na lungthlitum a tlin khawh nakhnga Pathian nih lam in hruai ko seh.
NTC: Atu bantuk in kei zong biahalnak nan kan ngeih caah kaa lawm tuk ve.
About The Author
