230KV Line Mei A Rawh Ruang Ah Chinram Le Kalay Ma-ha-dat-aa Mei A Mihnak Hi A Si
TCP-Kalay| 2018 November 29| Ma-ha-dat-aa mei a hmangmi Chinram le Kalay electric mei a mihnak a ruang cu Ngyaungpingyi le Chuangku kar 230KV line a rawh ruang ah a si tiah Chin ramkulh Electric zung tuanvo ngeitu upa sin in kan theih.
“Ma-ha-dat-aa line mei a hmangmi Chinram peng cheukhat le Kalay peng mei a mihnak a ruang bik cu Ngyaungpingyi le Chuangku kar 230KV line a rawh ruang ah a si. Atu hi a rawhnak an zohfel I an ser cuahmah lio a si. Mah a rawkmi an ser dih in cun mei a ra colh ko lai. Amahbelte, zeitik ah dah an ser dih khawh lai timi cu chim awk a tha lo, arauh hlan ah an ser khawh ko lai ti ka ruah. Cun, ruahlopi in chun tiang zong an arau kho i zanlei tiang zong a rau kho fawn” tiah Chin ramkulh Electric zung Director nih The Chinland Post ah a chim.
November 29, deilei suimilam 3:58am ah Nyaungpingi zung A-phase, zone-1, 28.01km in siseh, Chaungku zung in A-phase, zone-1, 62.62 kam in a rawk (trip). Cu ruang ah zung lutlai chang U Win Koe hruaimi riantuantu minung 5 cu mei a rawhnak kawl ding in November 29, deilei suimilam 4:30 ah Nyaungpingyi in an chuak cang tiah theih a si.
Hiti mei a rawh ruang ah 66KV line ma-ha-dat-aa mei a hmangmi peng le khua paoh mei a mih dihnak hi a si.
About The Author
