CDF-Hualngoram Nih Rih Sakhaan An Kah
The Chinlandpost | October 17, 2023 – Falam peng, Rih sakhaan cu CDF-Hualngoram nih October 14 ni ah an kah hna tiah theih a si. Rihkhawdar peng ah SAC sakhaan hi hmunhnih ah a um i, atu kahdohnak hi Rih sakhaan lei a si. Adang sakhaan pakhat cu 2021 kum in Tio lei kap ah SAC sakhaan pakhat a hun chiah than hi a si.
October 14 ah Rih sakhaan ah SAC ralkap hna cu CDF- Hualngoram nih an va kah hna i kaphnih karlak kahdohnak caan a rau lo. CDF-Hualngoram ralkap nih SAC ralkap 2 cu fak ngai in an hliam hna. CDF-Hualngoram ralkap lei an him, tiah CDF-Hualngoram ṭuanvo ngeitu sin in theih a si.
2023, March thla chung ah Kalaymyo in Hakha lei a kal mi SAC ralkap thazaang 200 leng le hriamnam a phortu motor 30 leng cu 2013, March 3 ah CDF Hualngoram nih Zawngkawng khua pawng ah bomb puahhnawh in an rak doh hna i SAC ralkap a thi mi le hliamhma tuar mi zong an um.
2023, March 13 ah Rihkhuadar sakhaan le Ṭio um SAC ralkap sakhaan cu 40MM Bomb in voi tampi an kah hnu ah hriamhme zong in an kah. Kaphnih karlak kahdohnak ah SAC ralkap hliamhma tuar le a thi mi an um i, kanmah lei nunnak liam le hliamhma tuar kan um lo, tiah CDF Hualngoram nih an rak thanh.
CDF-Hualngoram hmunhma chung ah Mipi ralkap le SAC ralkap, ZRA ralkap hna karlak kahdohnak a um lengmang ton.
About The Author
