Hakha Ah A Kumluanmi Eidin Pawl Tuanvo Ngeitu Nih Mei In An Khangh
Salai Cung| 2018 April 27| Chin ramkulh Hakha khuapi chung ah mizapi caah eidin pawl hi ngamdamnak he aa tlak in cawk le eidin khawhnak caah cozah lei tuanvo ngeitu FDA hruainak in April 25 ah dawr kip chekfelnak an tuah. Eidin siseh, sii-ai siseh a kum luan le luan lo chekfelnak an tuah i a kumluanmi paoh kha mei in an khangh.
Atu bantuk in eidin pawl a kumluan le luan lo hi a kum fatin te chekfelnak an tuah theu. Cu lawng si lo in Hakha khuapi chung sii dawr kip zong ah an zuarmi sii pawl a kumluan le luanlo an chek tawn lengmang. A kum luanmi paoh cu an chuh hna i an hlonh, an hrawhpiak theu hna tiah kan theih.
Hiti sii-ai le eidin lei a chekfeltu FDA phu in tuanvo ngeitu pakhat nih, “Hiti eidin siseh, sii siseh chekfelnak kan tuahnak a ruang cu mizapi ngandamnak ding runvennak caah a si. A kumluanmi sii-ai le eidin i eidin sualnak in thih khawh le zawtnak ngeih khawh a si caah tih a nung tuk. A cheu cu a kumluan le luan lo hngalh lo bu in an zuar chih, a cheu cu a kumluan hngalh ko bu in zuar chih a hmangmi an um theu. A kumluanmi sii-ai le eidin zuar cu upadi zong nih a onhmi a si fawn lo. Cucaah, mizapi ngandamnak he aa tlak in i runvennak caah atu bantuk in chekfelnak kan tuah le a kumluanmi eidin le sii-ai paoh mei in kan khangh dihnak hi a si” tiah The Chinland Post ah a chim.
A kumluanmi sii-ai le eidin pawl an hmuhmi hi a tam pah theu, tutan mei in an khanghmi zong a tam ngai tiah kan theih.
About The Author
